Zaninah D3 Inter Branch YMA Volleyball Spike Off

Central YMA leh Mizoram Volleyball Association chuan July 19-29, 2022 chhungin D3 Amrit Cement Inter Branch YMA Volleyball Tournament 2022 a buatsaih dawn. Inelna khuhhawna 'Spike Off' chu zanin dar 8:00 hian Central YMA Hall, Tuikhuahtlangah neih a ni dawn.

Spike Off-ah hian team tel tur Branch - coach, manager leh branch aiawh te kal ṭheuh tura beisei an ni. CYMA Sports vice president Lalhmachhuana chuan a spike off ang a, MVA president leh Main Sponsor Dr Lalmalsawma Nghaka chuan thusawina hun a nei bawk ang.

Inelnaah hian mipa team 104 leh hmeichhia team 39 an inlan dawn a, an vaiin team 143 an tel dawn. CYMA Volleyball hnuhnung ber hi kum 2018 khan neih a ni a, khami ṭum khan mipa team 57 leh hmeichhe team 19 an tel a, an vaiin team 76 an tel. Tun ṭum inelnaah hian team 67 zetin an tel tam zawk tihna a ni.

Zanin hian fixture tlangzarh a ni nghal dawn a, Central YMA finance secretary Roneihsanga'n a tlangzarh ang. Inelna hi R. Dengṭhuama Hall, Mualpuiah vek khelh a ni ang.

Mipa inelna hi ṭum 15 neih a ni tawh a, kum 1989-a inelna neih ṭan a nih khan Bungzung an champion. Champion hnem ber chu Maubawk an ni a, vawi thum an champion. Inelna hnuhnung berah Muanna Vengin nomawi an chawi.

Hmeichhe inelna hi vawi 19 neih a ni tawh thung. Kum 1990 aṭangin inelna ṭan a ni a, Champhai an champion hmasa ber a, champion lai chu Bungkawn an ni thung. Bungkawn leh Kanan ten record an nei ṭha a, vawi ruk ve ve an champion tawh a ni.