Elena Rybakina an inchuh

Russia khawpui Moscow chu a pianna a ni a, tennis a khelh chinah erawh Elena Rybakina hian Kazakhstan hmingin a khel. Wimbledon champion a nih takah chuan a chanchinin sawi zui a hlawh, tunlai indona boruakin a nghawng vang a ni ve bawk.

Indo buaina vangin Russian leh Belarusian player ten Wimbledon hi an khel ve thei lo. Russian rama piangin hmeichhe singles nomawi a chawi ta si a, a pianna ram Russia chuan he thil hi sawi nuam an ti hle.

Russian tennis chief Shamil Tarpischev chuan, "A va ropui tak em! Rybakina i ti ṭha lutuk, Wimbledon champion kan ni," tiin a sawi a, he thusawi hian helhtu a ngah, a ram miin thlawp mah se United Kingdom lam tan chuan lawmawm lo tak a ni.

Rusiian mipa player, a hun laia world number 1 pawh ni tawh Yevgeny Kafelnikov pawhin, "Mi thil siam chhuahsa i leisak a nih pawhin, a siamtu rilru leh thluak i lei telsak thei chuang lo," tiin a sawi ve bawk.

Rybakina-i nu leh pa hi Moscow khawpuiah an la cheng a, hei vang hian Russia lamin an la ta chei viau hi a mak hran lo. Chutihrualin senior huanga a luh dawn khan harsatna a tawk a, hetih laia puitu Kazakhstan a thlang hi dem theih a ni bik lo.

Kazakh prime minister Alikhan Smailov nen an inhmuh ṭumin, Wimbledon champion Rybakina chuan, "Kazakhstan mipui tam tak min thlawpa min ṭantu ka hmu hi a mak ka ti zawk, hetiang em em chu ka beisei phak lo.

"Thlawpna ṭha dawn aia hlu hi a awm thei tawh chuang lo, naupang tam takte tiphurtu leh chona siamtu ka nih ngei ka beisei," tiin a sawi a, a hlawhtlin theih nana puitu Kazakhstan a ngaih pawimawh thu a sawi.