AC/DC-in 'The Story Of Back In Black' Video Series tlangzarh

Rock band chuai thei lo AC/DC chuan kum 1980-a an tlangzarh 'Back In Black' album kum 40 tlin lawmna kal zelah The Story Of Back In Black' Video Series an tlangzarh a, episode hmasa ber chu YouTube lamah pawh thlir theihin an dah chhuak tawh.

'The Story Of Back In Black' hmasa ber hian an hla hit tak mai 'You Shook Me All Night Long' lam a hawi ber a, he hla nalh titute tan chuan a ngaihven chi hle ang. Kum 40 lai liam tawha an tlangzarh mah ni se 'Back In Black' hi nikum December-ah khan Recording Industry Association Of America (RIAA) chuan copy maktaduai 25 an thawn chhuah tawh avangin an 'certify' leh a ni.

Tlangzarh a nih kum, kum 1980 October thlaah khan a vawi khatna atan RIAA hian platinum a certify a, December 2007-a nih meuh chuan vawi 22 lai platinum album a ni hman. RIAA chuan 'Back In Black' hi khawvela album hralh hnem ber zingah a tel tih a puang hial. 'The Story Of Back In Black' episode hmasa ber hi minute 2:15 leka sei a ni a, 'You Shook Me All Night Long' chungchang an sawi hlawm a, live-a an perform-na clip-te pawh an dah tel bawk a ni.