DC United coach thar Rooney

Manchester United legend Wayne Rooney chuan Major League Soccer club DC United chu head coach ni turin a zawm a, Rooney contract rei zawng hi tarlan a ni lo a, season khatah £800,000 (Rs. 7,57,34,960) a hlawh dawn nia sawi a ni thung.

Rooney hian thla hmasa lawk khan club talbuai Derby County a chhuahsan a, England leh European club dang aṭangin sawmna hmu nual mah se, thla 18 ngawt player a lo nih tawhna DC United enkawl a thlang.

Kum 36 mi thutlukna hian sawi zui a hlawh viau a, mahse, Rooney chuan thutlukna dik a siam thu sawiin, "Article ṭhenkhat, a bik takin England lamah ka career atana hnungtawlh anga min ziahna ka hmu.

"MLS zah lohnaah ka ngai a ni," a ti a, English media ṭhenkhatin US top flight league an thlir dan chu MLS zah lohnaah a ngai.

Rooney chuan a nupui rawn chunga thutlukna siam a nih thu sawiin, "Thutlukna liantham ka siam reng reng, a bik takin tun ami angah hi chuan ka nupui ka rawn zel a ni," a ti a, hotunu phalna thlapa US pan a nih thu a sawi!

Derby boss hlui hi a nupui fanauten US-ah hian an zui dawn lo a, "Tun atan chuan England-ah an awm rih ang a, a ṭul changin min rawn tlawh ṭhin ang," a ti.

Rooney hian January 2020 khan DC United hi chhuahsanin, Championship club Derby County a zawm a, player-coach dinhmun luahin coaching staff zingah a tel.

Derby hian coach Phillip Cocu hnuaia beisei an phak loh avangin November, 2020 khan an ban a, coach lailawk atan Rooney an ruat - January, 2021-ah kum hnih leh a chanve chhung coach nghet ni zui turin contract a ziak.

Rooney hian inkhelh a chawlhsan zui a, coach hna chiah a thawk zui. Mahse, club inrelbawlna fel tawk lo leh sum hman nasat luat avangin Derby hi hrem zui an ni a, point 21 paihsak an ni.

Point 21 hloh chungin Derby hi Rooney-a'n Championship-a inhamtang turin a beihpui a, a mimal sum thlengin a hmang nia sawi a ni. Mahse, a tawpah erawh an ṭang zo lo a, team 24 inelna Championship-ah 23-na an ni a, League One-ah an tla thla.

American sumdawng hausa Chris Kirchner-a'n Derby lei a tum lai khan Rooney hi cham tura beisei a ni a, mahse, indawrna a tlawlh hnuah thla hmasa khan Rooney hian a chhuah tur thu a sawi a, tunah chuan DC United a zawm ta.

England leh United tana goal khung hnem ber record chelh mektu Rooney chuan, "England leh Europe aṭangin min rawn betu club an awm nual a, mahse, Derby ka chhuahsan khan chawlh hahdam ve hret a, ka hmaa inchhawpte nakina ngaihtuah kha ka duh ber.

"Mahse, ka agent-in min rawn biak a, DC United-in min duh thu a rawn sawi khan, khaw dang ka hawi tawh lo a, darkar 24 vel chhungin engkim kan tifel ta vek mai a ni," a ti a, US club-a a kir thei chu a hlim thu a sawi.

DC United hian April hnuah khan coach an nei leh tawh lo a, team 14 inelna Eastern Conference-ah 13-na an ni mek a, coach atana Rooney an ruat hmaa an match hnuhnung berah Philadelphia Union chuan 7-0 ngawtin an sawp.

Nimin zing khan Columbus Crew nen an inkhel a, 2-2 in an inhnehtawk - Rooney hian a work visa la fel lo avangin team hi a la kaihruai thei lo a, coach lailawk Chad Ashton chuan a enkawl rih a, Rooney hian a hmunah inkhel erawh a en tho.

United legend Rooney-a'n DC United a zawm takah chuan player langsar tak tak hming pawh lam rik zui a ni a, Atletico Madrid chhuahsan hlim Luis Suarez chuan a zawm dawn niin an sawi.

Mahse, Rooney chuan Liverpool striker hlui hi lakluh tumna a nei lo. Rooney chuan, " Luis Suarez hi player ṭha tak a ni a, ka zah em em. Mahse, kei chuan chak duha tuihal player ka mamawh," a ti.

Kum 35 mi Suarez hian Atletico-ah a contract a hman zawh tawh avangin a duh lam club pan turin zalenna a nei a, MLS aṭanga sawmna a hmuh nual thu a sawi.

Mahse, Uruguayan striker hi a kum a tam ve deuh tawh a, US a pan a nih chuan chawlh lam a rilruk tawh hial ang - hei vang hian Rooney hian player uaithla lam tawh lakluh hi a châk lo niin a lang.

Suarez hian Barcelona tan match 283-ah goal 198 khungin, 2020 season ṭan dawn khan Atletico a zawm. Madrid khaw club tan hian a season hmasa berah match 38 khelin goal 21 a khung a, La Liga nomawi a chawipui.

Season hmasaah beisei a phak lo zui a, inelna hrang hranga match 45-a khelhah goal 13 a khung - a season hmasa aiin a inlan hnem a, mahse, match 10-in bul a ṭan tlem thung.