United leh Martinez an indawr

Manchester United chuan Tyrell Malacia bak lakluh la nei lo mah se, player thar seng luh ngei tumin transfer bazar-ah an vir buai ve reng a, he thu buatsaih a nih laia an thuthar berah chuan Ajax defender Lisandro Martinez lalut turin inremna an nei hnai.

Kum 24 mi defender hi United hian inbiakna an neihpui reng tawh a, khawthlang media-te chuan club pahnih indawrna a kaltluan thu an sawi - he thuziak i chhiar meuh chuan Arsenal nen pawha sawi zawm hlawh hman defender hi Red Devils hian an lalut fel tawh hial mai thei.

United manager thar Erik ten Hag-a hman thiam sa Martinez hian season hmasa khan Ajax tan inelna hrang hrangah match 37 khelin goal khat a khung a, 5ft 9in a sang centre back hian United hi a zawm a nih chuan Premier League-a centre back zinga tawi ber a ni ang!

Red Devils hian Feyenoord aṭangin Tyrell Malacia chu kum li chhung atan contract an ziahpui tawh a, Netherlands international manah hian pound maktaduai 13 an inseng a, a khelh ṭhat dan a zirin £1.7mtd pek belh tur a ni dawn.

Ajax tan vawi 120 inlana goal ruk khungtu Martinez hi an lalut a nih chuan nipui transfer-a player an lakluh pahnihna a ni dawn tihna a ni a, Ajax Player of the Year ni lai a nih avangin a chungah beiseina a sang ang.

United hian Christian Eriksen chu a thuphungin inremna an neihpui tawha sawi a ni bawk a, he thuziak i chhiar meuh chuan Denmark midfielder hi an lalut fel tawh hial mai thei.