Liverpool leh Standard Chartered thawk zel dawn

Premier League club langsar Liverpool chuan shirt sponsorship lama an thawhpui Standard Chartered Bank nena thawk dun zel turin contract thar an ziak a, 2026-27 season thleng chu an kawr hmaah Standard Chartered tih an ziak dawn.

Liverpool leh Standard Chartered thawhdun meknaah chuan London-a hmunpui nei Standard Chartered hian kum khatah pound maktaduai 40 chu Reds hnenah hian an pe ṭhin a, an contract thar ang chuan 2023 aṭang chuan season khatah pound maktaduai 50 an pe tawh ṭhin dawn.

Merseyside club ṭantute chuan Liverpool kawr hmaa 'Carlsberg' tih inziak ṭhin kha an la theihnghilh kher lo ang. Standard Chartered hian kum 2010 khan Carlsberg luahlanin Liverpool nen an thawk dun ṭan.

Season thar aṭang chuan an thawhdun tawh loh mai rinna a lian hman a, Reds hian company dang inbiakna an neihpui nual hman. A tawpah erawh an thawhpui sa Standard Chartered an duhsak a, an thawk dun zel dawn.

Liverpool CEO Billy Hogan chuan, "LFC tan chuan thil lawmawm tak a ni a, Standard Chartered nen hlim leh lawm taka rei tak kan lo thawhho tawhna chu kan chhunzawm zel dawn a ni," tiin a sawi.