Mesut Ozil-a contract an tihtawpsak!

A vawi khatna chauh a ni ta lo, a club khelhna Fenerbahce nen buaina an neih avangin Mesut Ozil-a contract neih lai chu Turkish club hian an tihtawpsak a, inhriatthiam tawnnaa ti tawp an nih thu an sawi.

Fenerbahce nen an inṭhen thu an sawi fel a, an puanzar aṭanga darkar chanve pawh a liam hmain club thar a nei leh nghal. Minute 29 hnu lekah Istanbul Basaksehir a zawm tur thu puan zui leh nghal a ni.

Inṭhenna
Nikum January thla khan Ozil-a'n Fenerbahce hi a zawm, a contract neih laiah hian kum hnih dang a la awm. Mahse, kum thum leh a chanve daih contract a ziah zinga thla 14 chauh a hmang hman tihin a naupan laia a club nen hian buaina an nei.

Kumin March thla khan Fenerbahce chuan thuchhuah siamin, "Mesut Ozil leh Ozan Tufan te chu squad-ah telh an ni lo tih kan puang," tiin thuchhuah an lo siam tawh a, club hian an buaina tak erawh an tarlang tel lo.

A hnu lamah a club tan hian a inlan leh tawh lo. Boruak ṭha an nei thei lo a, thu hnai khan thu chhuah siam lehin, "Club leh Mesut Ozil inbiakremna angin a contract chu tih tawp a ni, a kal zelna turah duhsakna kan hlan," an ti.

Buaina chu
Theihna a nei sang a, a vanglai chuan player ṭha bik zinga mi a ni. Tun dinhmunah kum 33 mi chauh a la ni a, a vanglai a liamna erawh a rei tawh - tuna an buaina hi chiang taka tarlan a la ni lo, khelmual pawn lam buaina a ni tih erawh an ziak thung.

Coach Ismail Kartal-a'n Ozil hi a taksa a fit tawk lo, training a neih ṭhat loh bakah khelmual pawn lam thil dangah a buai lutuk tiin a chhawr lo. Kartal-a hi a hnuah ban a ni a, coach thar atan Jorge Jesus an lalut.

Jesus hian Ozil hi a bia a, beiseina pawh an nei. Amaherawhchu, ani pawhin Germany international hlui hi chhawr tlakah a ngai chuang lo, atan Fenerbahce chhuahsana puanthuah tel mai loh chu duhthlan tur dang a awm lo.

A hma pawhin
Germany tan World Cup nomawi a chawi a, Real Madrid tan hlawhtling takin a khel bawk. Spanish club aṭang hian Arsenal a pan a, kha tih laia Gunners manager Arsene Wenger nen an inkawp rem hle.

Mahse, Wenger-a'n a hnuhnung lamah Ozil hi a mil lo, amah thlaktu Unai Emery leh Mikel Arteta te pawhin chhawr tum viau mah se an mil thei ta chuang lo, a contract chu thla ruka a la zawh hmain tihtawp sak a ni hial.

Club lamah buaina a neih chu thuhran. Germany tana inkhelh a chawlhsan hnuah German Football Association (DFB) tana pawm theih loh thu thu a ziak chiam a, boruak ṭha lo tak nei chungin an ram team hi a lo mangṭha tawk bawk - Ozil leh buaina hi thil thar a ni lo.

Ṭawngkam ṭha
Arsenal a chhuahsan hnu khan, mipui hip thei tur leh khawngaih theih tur takin North London club a mangṭhana thu a ziak. Tunah pawh Fenerbahce a thlahna thu chu a lungkuai zawng bawkin a ziak leh, a mizia a la danglam chuang lo tihna a ni.

Fenerbahce tana match 37 kheltu Ozil chuan, "Hringnun hi chu hrilhfiah leh rin thiam lawk theih loh thilin a khat. Ruahmanna leh duhthusam te pawh kan duh ang vekin a kal thei lo. Fenerbahce jersey ha chunga hlawhtlinna chan hi ka duhthusam a la ni reng.

"Min thlawp tlattu Fenerbahce fans leh chhungkaw chungah lawmthu ka sawi," tiin thlahna thu a ziak a, a naupan laia a club khelh chakna leh ṭan em em tan hian hun a hmang rei lo a, hlawhtlinna leh sulhnu lian hnutchhiah a nei ta lo.