Spurs an chak chiang

Pre-season tour nei mek Tottenham Hotspur chuan an match hmasa berah 6-3 in K League XI an hneh a, Seoul World Cup Stadium-a mipui 66,000 hmaah South Korea fapa rangkachak Son Heung-min chuan goal hnih a khung - an ram mipui lawm a hlawh hle.

Spurs tan Harry Kane chuan goal hnih a khung ve bawk a, Eric Dier leh Kim Jin-hyuk (own goal) ten London club tan goal khat ve ve an thawh bawk a, South Korean top flight league-a player ṭha thlanchhuahte tan Spurs an la sang hret.

K League XI tan hian South Korea international striker Cho Gue-sung, South Africa striker Lars Veldwijk leh Japanese attacking midfielder Jun Amano te chuan goal khat ṭheuh an khung a, awmzia erawh a nei phak lo.

Spurs tan Everton aṭanga pound maktaduai 60-a an lakluh Richarlison pawh a inlan a, Brazilian forward hian goal erawh a khung lo - Spurs hian July 16 tlaiah Sevilla chu Suwon, South Korea-ah an hmachhawn zui ang a, hemi zawhah hian Europe lamah an kir dawn a ni.

July 23 zanah Glasgow, Scotland-ah Rangers nen an inkhel ang a, July 30-ah Haifa, Israel-ah AS Roma hmachhawn zuiin, August 6, zan dar 7:30-ah Southampton chu league-ah hmachhawnin season an ṭan ang.