Khatla an chak phawt, zaninah Game 2
Khatla TBL tan Mizoram Super League nomawi a vawi thum nana chawi turin zanina chak a tawk. Thawhlehni zan khan MSL3 Finals Game 1 inkhelah TBL hian Mission Veng Vikings chu 66-52 in an hneh a, zanin dar 8:00 hian R. Dengṭhuama Indoor Stadium, Mualpuiah Game 2 khelh a ni ang.
Vikings hian champion lai TBL hi an hneh let a nih chuan May 19, Zirtawpni zanah Game 3 khelh leh tur a ni. Tualchhung basketball-in hun pui an hmang mek a, basketball ngaina lo tan pawh mipui tam hrim hrim hi hmuhnawm tham a tling. Zanin hian Khatla TBL ṭantuten nomawi chawi lai thlir tumin Mualpui an pan ang a, Game 1 aṭanga thlir chuan champion lai ṭantu aia tam Mission Veng Vikings ṭantuten Game 3 thlentir tumin ṭan an la ang.
TBL-in dinhmun ṭhaa an din theih nan hrem vanga Game 1 khel thei lo Chris Solomon chuan point 30 a score bakah rebound ṭum 13 a la a, court chhunga player langsar ber a ni. Slam Dunk contest-a pakhatna Ronald March-a'n ṭum dang a phak lo, point 21 a neih chu Vikings chak pui nan a tam tawk lo.
Dunk - Vawi 1 chiah!
Inkhel ṭan phatah TBL an chefuh hmasa zawk, champion lai tan hian Nelson Lalrohlua chuan point nei hmasa berin Gospel Lalthawmmawia'n a nei zui bawk. Quarter hmasa berah Khata team hian 19-13 in hma an hruai.
Vikings innghahna Ronald March chu quarter hmasa berah khel ṭha tawkin loin quarter hnihnaah a thiam thil a pholang, Vikings guard hian chiang zeta dunk-in 23-23 a nih pui. American tlangval hian a hnampui Chris Solomon-a a block hnuah free throw aṭangin a team hma a hruai pui - Vikings lamin 29-27 a hma hruai chungin chawlhlawk an hmang.
Solo-a a solo
Inkhel chawhnu lamah TBL-in champion zia an lantir. Match thum hrem a nih hnua rawn kir Solomon-a'n hun pawimawhah a theihna a rawn pholang ve thung. American guard hian point 30 a score zinga point 14 zet chu quarter thumnaah hian a score, an team point score hnuhnung 12 zinga 10 chu a luh vek a ni bawk.
MBBA dan leh hrai angin quarter li zingah vawi khat chauhah state pawn player/foreigner pahnih luh rualtir theih a ni. TBL hian Solomon leh Akash Deep Hazra te chu quarter linaah luh rualtirin he quarter bikah hian point 20 an neih belh laiin Viking lamin point 10 bak an neih belh thei lo - a tawpa an inthlauhna chu point 14 a ni.
Eng nge an sawi?
Mission Veng Vikings coach Reuben Lalchhandama chuan, "Ka nau ten final an vawi khat khelhna an nih avangin an talbuai tih hairual a ni lo. Ka hmuh dan chuan an theihna chanve pawhin an khel chhuak lo, zaninah chuan boruak a danglam tawh ang. Kan la tlawm lo a, huaisen takin kan bei let leh dawn a ni," tiin Vanglaini a hrilh.
Vanglaini zawhna chhangin Khatla TBL manager Lalawmpuia Pachuau chuan, "Kan nauten chak duhna thinlung an nei a, kan thawhrim vangin hnehna kan chang. Game 3 khelh ngai loin hnehna chan tlang nghal kan tum, chak zawn tur erawh chuan a hma aia kan beih nasat a ngai dawn a ni," a ti.
A la tawp lo
Mizorama basketball inelna sang ber MSL3 Finals hi best of three series hmanga khelh a ni a, zaninah Vikings an chak ve leh a nih chuan Zirtawpni zanah Game 3 khelh a ni dawn.
Mission Veng hian a vawi khat nan MSL nomawi chawi an duh a nih chuan Game 1-a tihsual an ngah tak kha an siamṭhat a ṭul dawn. An thiampuipa March-a kut kal loh zanah Lalrina Renthlei leh Michael F. Lalawmpuia ten beisei an phak lo, tualchhung player-ten final boruak an zo lo tih a chiang.
Coach leh player nikawp H. Laldinsanga kaihhruaina hnuaia khel TBL-in Ronald March veng turin player ruat bik an nei a, Gospel Lalthawmmawia leh Nelson Lalrohlua ten an hna an tlin. MSL khel tawh player malkhaia hmuhnawm bera chhal ngam hi an dah ṭha thei a, Vikings-in inzirna tur an nei a, TBL-in March hi an dah ṭha nawn ang em tih chu zaninah a hriat ang.