Arsenal leh City chak Champions League khel tur a la chiang lo!
Thawhlehni zan Premier League-ah Arsenal leh Manchester City ten an khingpui ve ve hnehin point thum an hlawh chhuak a, Liverpool-in kartawp inkhelah West Ham an hneh bawk si avangin club pathum zingah season thara Champions League khel tur a la chiang thei lo.
Emirates Stadium-ah Arsenal-in beisei tur nei tawh lo Sunderland an mikhual a, Alexis Sanchez goal hnih khung hmangin 2-0 in hnehna an chang - beiseina an neih chhunzawm zel.
City defender Pablo Zabeleta-a'n Etihad Stadium-a a match hnuhnung ber a khelh zanah chak result nen kum kaw chhung hun a lo hman tawhna khelmual a mangṭha a, West Brom lakah Gabriel Jesus, Kevin de Bruyne leh Yaya Toure te goal khung hmangin 3-1 in hnehna an chang - Baggies goal neihchhun hi Hal Robson-Kanu khung a ni.
Arsenal vs Liverpool
Gunners-in Black Cats laka hnehna an chan avangin Liverpool thin phu a rang sawt a, Boro lakah pressure sang tak neichungin an khelh phah dawn. Hriatreng tur erawh Reds hi anmahni kuta innghat an ni a, Arsenal erawhin result ṭha piah lamah Boro puihna an mamawh tel dawn.
Arsenal-in Champions League khelh dan kawng li an la nei - an chance ṭhat dan ber chu an match hnuhnung bera Everton an hneh a, Reds-in Boro an ngam loh bawk a ni. Gunners tan kawng dang a la awm cheu. Everton nen 0-0 emaw 1-1 in inhnehtawk ta pawh ni se Liverpool hi 3-0 tala an tlawm chuan Champions League an khel thei ang.
Hei mai bakah hian 2-2 in in draw ta se, Reds hi 2-0 a an tlawm bawk chuan Europe-a club ṭha inelnaah an inlan thei ang. Arsenal hian Reds nen hnehna chang ve ve se, Champions League khel tur chuan City-in goal nga tala an khingpui an ngam loh a ngai thung - hei erawh hriat a ṭha, Arsenal beiseina hi 'ta se' tih vekah a la innghat!
Pep-a beiseina
City-in West Brom an hneh a, manager Pep Guardiola-a'n beiseina a nei sang sawt hle - match khat khelh tur la nei mah se pathumna nichunga season khar turah a inngai tawh. Spanish manager chuan, "Pathumna ni chunga season khar chu kan kutah a innghat ta. Manchester United, Arsenal leh Liverpool chunga season khar hi a duhawm a, season tharah chuan tun aia ṭha zawka kan tih theih ka beisei," a ti!
Uluk taka table thlir chuan Pep-a sawi ang ngawt erawh a la ni lo. Pathumna City leh pangana Arsenal inkara point awm hi point thum chauh a ni a, an goal difference thlenga an intluk tlan avangin season tawpah pathumna pahnih emaw palina pahnih awm theih a ni.
Premier League danah, "Season tawpah league champion, relegate emaw inelna danga invawrh kai theihna position-ah club pahnih emaw a aia tam te chu point, goal difference leh goal khung thlenga an intluk vek a nih chuan playoff match khat emaw a aia tam neutral ground-ah an khelh a ngai dawn a, a hun leh hmun chu board-in a ngaihtuah ang," tih inziak a awm a, he thil hi tun dinhmun aṭanga thlir chuan thleng thei a ni.
Engtin maw?
City leh Liverpool-in pathumna dinhmun an luah ve ve theih dan a awm - Pep-a naute Watford nen 3-3 a an inhnehtawka Reds-in 3-0 a Boro an hneh chuan pathumna dinhmun inchuhin playoff an khelh a ṭul dawn - he dinhmunah hi chuan hnehna chang pawh ni se Arsenal-in beisei tur an nei thei lo ang.
Gunners leh City-in palina dinhmun inchuha playoff an khelh theih dan a awm - Vicarage Road-ah City hi 4-0 in tlawm se, Arsenal-in Everton 1-0 in hneh se emaw City 5-1 a an tlawm a, Arsenal 2-1 a an chakin club pahnih hi palina an ni ve ve dawn tihna a ni - a chinfelna tur chu playoff.
Playoff a thlen theihna chance sang ber nia lang chu Arsenal leh Liverpool-in palina an inchuh a ni. Gunners-in 1-1 a Everton an inhnehtawkpui a, Liverpool hi 2-0 a Boro laka an tlawm bawk chuan club pahnihin palina inchuha playoff an khelh a ṭul ang - football a nih miau avangin thleng thei lo a awm lo a, match tawp ber khelh hun thlengin Premier League a ngaihnawm dawn e.
Club pathum hmabak
Watford 07:30 PM Manchester City
Liverpool 07:30 PM Middlesbrough
Arsenal 07:30 PM Everton
*Match pathum hi May 21 zana khelh vek tur a ni