Pune City leh Chanmari FC inthlunzawm

Indian Super League club Pune City chuan nimin khan Mizoram Premier League club Chanmari FC nen inremna an ziah thu an puang.

Inremna chu

MPL champion lai Chanmari FC leh Pune City te hian first team, academies, youth development, training-naa inpuih tawn leh player lak kawngah thuthlung an ziak a. Club pahnihin inremna a pawimawh tak pakhat chu ISL club Pune City hian Chanmari FC player-te an club-a khel thei turin kawng an sial sak dawn a ni.

FC Pune City hian Chanmari FC-in naupang ṭha zawk an neih theih nan an pui dawn a, training hmanrua leh coach an pe ang. ISL club hian Mizo player chu kum naupang te aṭangin professional player ni turin an zirtir dawn tihna a ni.

Chanchinṭha

Pune City CEO Gaurav Modwel chuan, "Kum thum chhung football-ah ke kan pen ve tawh a, tun hi kan tan hun pawimawh a ni. Football hmasawnna tur hian kan inhawng reng a, tun ṭuma Chanmari FC nena kan inzawmna pawh hi kan ngaihlu takzet a, hlawkna a awm ngei pawh kan ring tlat a ni. Keini leh CFC hian Mizoram football hmasawn theih nan kan thawk ho dawn a ni," tiin tum

ṭha tak an neih thu a sawi.

Chanmari FC board secretary Andrew Lalremkima chuan, "Mizoram football tan hmel thar a ni a, Mizo footballer ei zawnnaa hmang duh tan kawng zau zawk a inhawng dawn tihna a ni. ISL club Pune City nena kan inzawm thei hi kan lawm a, tun hi a bul ṭanna chauh a ni. ISL club dang pawhin MPL club dang hi thawhho puiah an rawn la sawm chhoh ngei ka ring a ni," tiin an inremna chu Mizoram football tana chanchin ṭha a nih thu Vanglaini a hrilh.

Engtin zel?

Pune City FC hi Indian Super League club an ni a, he club neitu chu Rajesh Wadhawan Group leh Bollywood star lar Hrithik Roshan te an ni. CFC board secretary Andrew-a'n Vanglaini a hrilh dan­in Pune City hian ISL an khelh bakah season liam ta khan I League Under 18 an khel a, season tharah I League club neih an tum bawk.

Chanmari FC board secy An­drew chuan, "Tun hma chuan phai club-a khel turin mahni sum senga zinchhuah a ṭul a, Aizawla trial an rawn buatsaih pawhin ni hnih khat chhung lekin pariat te an thlang a, player ṭhenkhat chu an rawn thawn haw leh ṭhin. Tunah erawh Chanmari FC hnuaia player-te chu Pune lamaṭanga rawn kal coach-ten training an rawn neih pui a, a ṭha bik an la thla tawh ang. Club leh player-in hlawkna a nei tawh dawn a ni," tiin tualchhung player tan phaia khelh theihna hun ṭha an hawn sak thu a sawi.

Chanmari FC chuan ISL club Pune City nena an hmalakna kal zelah trial a ko thuai dawn a, club hotute chuan trial hmachhawn turte chu lo inring lawk turin an ngen a ni.

Mizo hma ngai Pradyum

Pune City FC assistant coach Pradyum Reddy hi India ramah sulhnu ṭha tak nei a ni a, Mizote kawng sialsaktu a ni.

Scotland-a piang Pradyum hian India rama a bul ṭanna chu Shillong Lajong a ni a, kum 2010-12 chhung khan Lajong head coach a ni. Hemi chhung hian Mizo ṭhahnem tak I League khelhna hun a pe a, Lajong-ah hian Mizo tlangval Samson Ram­engmawia chu captain atan a hmang. Pradyum hi I Day Football 2011-a Lammuala Shillong Lajong rawn champion puitu kha a ni.

Kum 40-a upa Pradyum hian kum 2013 khan Bengaluru FC panin Ashley Westwood-a hnuaia assistant coach hna a chelh a, Blues hlawhtlinna kawngah mi pawimawh a ni. Pradyum hian Bengaluru FC-ah pawh Mizo a duhsak chhunzawm a, result ṭha neihpuiin I League vawi hnih a champion pui bakah Federation Cup-ah a champion pui bawk.

Indian football hrechiangte chuan Ashley Westwood-a'n result ṭha a neih chhanah Pradyum hi an ngai a, tuna Blues manager Albert Roca-a'n result ṭha a neih loh chhan hi Pradyum anga Indian player hrechiang a neih ve loh vanga ngaih a ni bawk.