Barcelona an chesual leh tawh; nomawi a hla!

Spanish La Liga champion tum inum boruak sang tak karah Barcelona an chesual leh tawh a,  tlak hlau Celta Vigo nen khualmualah 2-2 in an inhnehtawk. 

Nizan khan Real Madrid chuan khualmualah Espanyol an luhkhung a, he thu buatsaih lai hian an result kan hre hman lo - an chak chuan point hnihin Barcelona an tlanpel ang.

Barcelona tan Luis Suarez chuan goal hnih khung mah se Celta-in Fedor Smolov leh Iago Aspas hmanga an chhanlet avangin Suarez hmingthanna tur an hliahkhuh. 

Catalan club tan champion beiseina a chuai ṭan a, Celta Vigo-in a zawna match thum hnehna an chan tak avangin season thara La Liga khelh chhunzawm zel beiseina a nung thar thung. 

Barcelona-in champion turin chak an mamawh a, Celta-in him turin chak an mamawh ve tho. Goal khung hmasatu chu Barcelona an ni a, Luis Suarez chuan minute 20-naah Lionel Messi freekick aṭanga ball kal chu a tauh lut. 

Mahse, mualneitu Celta-in an mikhual lakah ṭhat chhuah an tum bik lo a, an him nan theihtawp an chhuah - minute 50-naah goal an sual chhuak ta nge nge a, Russian striker palian Fyodor Smolov chuan  Okay Yokuslu hnen aṭanga a ball hmuh chu nuamsain si phurh sut nan a khung. 

Barca an beidawng duh bik lo. Minute 67-naah Luis Suarez a inlar leh a, striker tawnhriat nei ṭha hian player thiam bik a nihzia pholangin goal mawi hmangin Barca hi hma a hruai nawnpui. 

Catalan club-in chak an inbeisei a, point thum an hlawh ngei dawn niin an inhria. Mahse, hun tawp nan minute hnih chauh a awm tawh tihah Aspas chuan freekick hmangin goal a rawn khung a, Barca nen an inhnehtawk. 

Messi-a'n Leganes laka 2-0 a hnehna an chan ṭumin penalty hmangin goal a khung a, a professional career-a ram leh club tana a goal 699-na a ni - khawvelin Messi hi a goal 700-na nen a hmu thuai dawn niah a inngai. 

Mahse, Argentine striker hian Leganes hnuah goal a khung leh ta miah lo a, goal 699-ah a la tang reng rih! Barca-in hnehna an chang chho leh tak tak dawn a nih chuan goal khung turin Messi an mamawh a, kum 33 mi striker hian a la chuai lo tih a pholan vat a ṭul ang. 

Hetihrual hian Messi hian goal khung lo mah se ṭhiante goal khung tur assist kawngah hna erawh a la thawk reng a, Suarez goal khung pahnih kha a siamsak a ni - Barca tan assist vawi 250 a neihna a ni!

Barca goal hmahruai khung nana a freekick hmanga Suarez a zawng 'hmu' phei kha chu player thiam bik leh thluak fing tan chauha tih chi a ni a, he striker hian tun season-ah league goal 21 leh assist 17 a nei tawh tih hriat tel sak 

a ṭha. 

Barcelona coach Quique Setien-a'n player manto Antoine Griezmann chu bench-ah a dah a, French forward aiah hian rawlthar duhawm Ansu Fati chu bul ṭantir a ni. 

Setien hian minute 69-naa Fati a lakchhuah pawhin Griezmann-a la luhtir duh chuang lo a, Danish striker naran ve tak Martin Braithwaite zawk luhtirin Atletico Madrid team khaidingtu lo ni tawh Griezmann hi minute 81-naah Suarez thlak turin a luhtir ve  chauh. 

Barca boss Setien chuan, "Midang ti hrehawm turin thutlukna ka siam lo a, kan team tana ṭha ber tur ngaihtuah chungin player ka luhtir. Player man zat ka ngaihtuah ve ngai lo," a ti deuh kher!

Griezmann hian tun season-ah Barca tan inelna hrang hrangah match 42 khelin goal 14 a khung tawh a, Atletico-a season nga a khelh chhunga season tin goal 20 chuang khung thei tan inchhuanna tur a ni lo. 

Barcelona chak zawh lohin Celta a hliahkhuh a, a phena striker pawimawh Aspas pawhin ngaihven a hlawh tawk lo - Liverpool-a lo hlawhchham tawh striker hian media-te ngaihven hlawh vuk lo mah se fak phu a ni. 

Kum 32 mi striker hian tun season inelna hrang hrangah match 32 khelin goal 12 a khung fel leh der tawh a, Premier League-ah hlawhchham mah se Spain-ah chuan striker hlauhawm ber pawl a ni reng. 

Spain tan vawi 18 inlana goal ruk khung thei striker hian 2015-16 season khan Celta-ah hian Sevilla aṭangin a kir leh a, match 40-a khelhsakah goal 18 a khung nghal - hemi hnu season-ah goal 20 a la khung tling ziah. 

Aspas hian season hmasa khan inelna hrang hrangah match 29 khelin goal 21 a khung a, 2016-17 season khan match 49 khelin goal 26 a khung a, 2017-18 season khan match 37 khelin goal 23 a khung bawk - season liam ta pahnihah khan UEFA La Liga Team of the Season-ah a lang ve ve.