Sharapova tan hmun a awm lo

Maria Sharapova tan French Open-ah hmun a awm dawn lo. Thawhlehni zan khan French Tennis Federation (FFT) chief Ber­nard Giudi­celli Ferran­dini chuan Sha­rapova tan wild­card an pek theih loh tur thu hi a sawi chiang a ni.

Ferrandini chuan, "In­hliam leh hrem vanga lo kir hlim tan wildcard pek a ni dawn lo," tiin a sawi. Ro­land Garros hi May 28 aṭanga khelh ṭan tur a ni ang.

Tennis inelna ngaih­hlut bik Grand Slam-ah hian qualifying khel tur pawhin top 200 nih a ngai a, main draw zinga lang tur phei chuan top 100 nih a ngai. Hetiang din­hmun luah phak lo, player duhsak bik tan wildcard pek ṭhin a ni bawk.

Kum 30-a upa Shara­pova hi hrem a nih hnuah ranking nei loin a rawn kir a, Stuttgart Open leh Ma­drid Open lama a inlan tawhna vangin world num­ber 211 a ni mek a, Rome Open first round a paltlang avangin a sang 200 zingah chuan a tel phak dawn.

Russian star hi July thlaa khelh tur Wimbledon qualifying khel tur chuan a in vaw tling tawh a, mah se French Open atan erawh hun a tep ter tawh a, a ranking chhuak thar hi a rin hman dawn loh avangin qualifying pawh a khel phak dawn lo tihna a ni.

Grand Slam vawi nga champion tawh Sharapova hian Thawhlehni zan khan Rome Open second round-ah Lucic-Baroni a hmachhawn a, 4-6 6-3 2-1 a hma a hruai laiin malpui vei lam na vangin a inkhel zui thei ta lo.