Mumbai tan Supergiant an lian
Indian Premier League-ah Rising Pune Supergiant chuan final an lut ta. Pune club hian Thawhlehni zan khan qualifier 1-ah Mumbai Indians chu run 20-in an hneh a, table chung bera league round khartu Mumbai kalsanin final an lut.
Mumbai Indians tan hnual lutukna tur erawh a ni lo. Nizan khan Sunrisers Hyderabad leh Kolkata Knight Riders chu eliminator round-ah an inhmachhawn a, he inkhela chak zawk hi final luh inchuhin qualifier 2-ah Mumbai Indian hian an la hmachhawn leh thei dawn a ni. Nizan inkhel result erawh he chanchin buatsaih a nih lai hian kan hre hman lo.
Pune tan Rahane
Wankhede Stadium, Mumbai-a inkhelah Pune an bat hmasa zawk a, opener Ajinkya Rahane chuan ball 43 a hmachhawna run 56 siamin inkhel bul a ṭan ṭha hle. Rahane-a'n bul a ṭanpui Rahul Tripathi run siam loa a out hnuah captain Steven Smith chu run khat chiah siamin a out ve leh a, Supergiant-in beidawn nan an hmang lo.
Manoj Tiwary chuan run 58 a siam ve leh a, MS Dhoni chu run 40 siamin a tawp thleng a dam bawk - Pune-in over 20-ah run 162 siamin wicket li an hloh a, target pangngai tak a nih rualin Mumbai thiamna leh theihna enin hahdam taka awmna chi erawh a ni lo.
Pune chhandamna bowler
League round-a vawi hnih an intawna a tlawm zawka ṭang ve ve Mumbai-in tlawm nawn tum lo mah se opener Lendl Simmons chu run nga chiah siamin a out a, Parthiv Patel-a'n a dinpui pa mualpho tur khuh nan run 52 rawn siam mah se MI batsman dang zingah run 20 vaw kai an awm lo - Pune bowler te an ngam lo.
Pune tan bowling lamah Washington Sundar chuan over li a vawmah run 16 chiah pein wicket thum a la a, Shardul Thakur chuan over li tho vawma run 37 pein wicket thum a la bawk - over 20-ah Mumbai-in run 142 chiah tlinin wicket kua an hloh a, an tlawm.