India leh Nepal inkhel dawn
AFC Asian Cup 2019 qualifier khel tura inbuatsaih mek India chuan Nepal nen friendly match an khel dawn a, ram pahnih inhmachhawn tur chungchang hi All Nepal Football Association (ANFA) chuan an website-ah an pholang a ni.
June 13-a Kyrgyzstan nena AFC Asian Cup qualifier match khel tur India hian a tir takah chuan Lebanon nen friendly match khelh an tum a, mah se Lebanese FA lamin India rawn thlen ruala 'visa' pe mai tura an ngenna chu India sorkarin a ti hlawhtlin sak theih loh avangin Lebanon hi an inhnukdawk.
India-in hun tep ter tawh takah friendly match khelhpui tur dang an zawng a, ram ṭhenawm Nepal nen June 6-a Andheri Sports Complex, Mumbai-a inkhelh an ti tlu ta a ni. Stephen Constantine-a enkawl India hi AFC Asian Cup 2019 qualifier-ah Group A-ah awm mekin match khat an khel tawh a, an match hmasa berah Myanmar chu khualmualah an hneh a ni.