Premier League hnaihtu Reading
Reading chuan season thara Premier League khel turin match khat bak chak an mamawh ta lo - Thawhlehni zan khan Championship playoff final lut turin Fulham chu 1-0 in an hneh a, inkhel hmasa nena belhkhawmin an chakna hi 2-1 a ni. Wembley-a final khelh turah hian Huddersfield leh Sheffield Wednesday inkhela chak zawk an hmachhawn ang.
He inkhela goal awmchhun hi minute 49-naa lut a ni - Fulham centre back Tomas Kalas handball avangin Reading-in penalty an hlawh a, French forward Yann Kermorgant chuan harsatna nei loin a khung. Fulham-in an si phurh sut theihna remchang vawi tam nei mah se Reading goalkeeper Ali Al Habsi an paltlang thei lo - Oman international hian Ryan Fredericks, Kevin McDonald, Tom Cairney leh Sone Aluko te hun ṭha neih chu a dan sak vek.
Reading-in Championship playoff final an luh rualin chanchin lawmawm puan tur an nei nghal a, Chinese sumdawng hausa unau Dai Yongge leh Dai Xiu Li te chuan club neitu nihna 75% an lei - he thu hi inkhelh zawhah an puang nghal a ni.
Manchester United legend, a season khat nana Reading enkawltu Jaap Stam chuan, "Kan theihna zawng zawng nen inelna kan hmachhawn a, tun season-ah hetiang taka khelh hi vawi tam kan nei tawh. Final lut tur hian kan thawkrim em em a, a chang chuan football ringawt ni loin result ngaihtuah tel a ngaih chang a awm. Kan hnathawhah kan in chhuang a, final harsa tak kan hmachhawn dawn tih inhre mah ila ṭha taka khelh kan tum ang," tiin Premier League khelh ngei an tum.