Bul ṭannaah Robben a kir dawn

Dutch legend Arjen Robben chuan July 2019 khan inkhelh chawlhsan tawh mah se a hmun ngainat khelmuala lut leh turin a lo kir a, kum 36 mi nichungin a professional career ṭanna Groningen a zawm leh dawn. 

Kum 16 mi lek a nihlaia Groningen tana a match hmasa ber kheltu forward hian season thar atan a club hlui hi a zawm a, a kum a tam tawh avangin professional footballer ni tura lo kir leh chu a tan chona nasa tak a nih tur thu a sawi. 

PSV Eindhoven, Chelsea, Real Madrid leh Bayern Munich tana lo khel tawh forward chuan, "Groningen kawr hak leh hi ka lo mangphan ṭhin chu a ni a, ka hlawhtling dawn em tih erawh ka sawi lawk thei bik lo," a ti a, fan-te thurawn anga a thinlung duhthlanna zawma lo kir a nih thu a sawi bawk. 

Covid-19 vangin Dutch league sang ber Eredivsie pawh tihtawp a ni a, Groningen hi a tuar nasa pawl an ni. Robben chuan, "Corona vanga buaina paltlang turin club hian a tih theih apiang a ti a, keipawhin ka theihtawp ka chhuah. 

"Ka tih theih tur dang ka ngaihtuah a, club chhungkuaa mi tam tak nen kan inbe bawk a ni," a ti a, inkhelh leh chu a club hlui a puih theihna turah a ngai a ni. 

Netherlands tan vawi 96 inlana goal 37 khung thei Robben hian Bundesliga (8), DFB-Pokal (5), Champions League (1), Premier League (2), FA Cup (1), League Cup (2) leh Eredivsie (1) nomawi a lo chawi tawh a, kum 2010 khan World Cup final a lo khel tawh bawk.