City-in Liverpool zahna lantir dawn

Manchester City manager Pep Guardiola chuan Etihad Stadium-a Liverpool an lenluh hunah zahna lantir nan 'guard of honour' an pek tur thu a sawi a, Liverpool hi July 2, zan dar 12:45-ah an mikhual dawn. 

Chelsea-in Manchester City an hneh hnuah Liverpool hi kum 30 hnua a vawi khat nan Premier League-ah an champion a, City khelmuala an zin tur hi league champion an nih hnua an match hmasa ber tur a ni. 

Pep chuan, "Guard of honour hi kan lo pe ngei dawn a ni. Kan ina an lokal hunah Liverpool kan zahna hi mawi takin kan lantir dawn a, an phu avanga zahna lantir tur pawh kan ni," a ti. 

Premier League champion-te hi an champion tih a chian hnua an inkhelh lehnaa an hmachhawn club-ten zahna lantir nan 'guard of honour' an lo pe ṭhin a, club inhal tam tak chuan hei hi tlawmah lain an pe duh lo lui ṭhin!

Guard of honour hi inkhelh hmain pek ṭhin a ni a, champion team lo chhuah hmain an hmachhawn tur team te chu khelmual luhnaah lo ding tlarin champion team player-te chu kut bengin an lo lawm ṭhin a ni. 

Hetihlai hian kum 2021-a City-a a contract hmang zo tur Pep hian Etihad Stadium-a a cham dawn leh dawn lohah thu thar a la nei duh lo a, "He club-a ka awm thei hi ka lawm takzet a, hma hun thui tak lo ngaihtuah vak erawh ka duh lo," tiin a sawi.