Real Madrid tan champion a hnai

Spanish La Liga nomawi chawi tura Real Madrid-in an mamawh zat chu point khat chauh a ni ta. Zinedine Zidane-a naute hian Nilaini zan khan Celta Vigo chu 4-1 ngawtin an sawp a, goal hnih khungtu Cristiano Ronaldo chuan Europe-a league sang panga zinga goal khung hnem ber dinhmun a luah nghal bawk.

Kum 31-a upa Ronaldo hian Celta laka goal hnih a khung chiah hian Europe-a league sang pangaah goal 368-a khung tling chiah a, kum 1971-a English striker Jimmy Greaves-a'n record a lo siam tawh chu kum 46 hnuah thaichhiatin a awm ta - Ronaldo ropuina belhchhahin a awm zel.

Barca beisei a bo?
Celta khelmualah Real tlawm se chuan head-to-head a chungnung zawk Barcelona tan champion turin an match hnuhnung bera Eibar hneh a tawk - beiseina nen Catalan club ṭantuten Celta Vigo lam hawi mah se an beiseina chhut chhiat sak turin Ronaldo a inlar.

Portuguese forward hian minute 10-na lekah goal hmahruai a khung a, chawlh­lawk hman a nih hnu minute thumnaah an goal hnihna a khung chhunzawm bawk. Minute 62-naa Iago Aspas hnawhchhuah a nih hnuah rin loh takin John Guidetti chuan an si phurh a sut ṭhen a, mah se Real chhaih kawlhna goal mai a ni. Karim Benzema leh Toni Kroos ten goal dang an khung chhunzawm a, Ronaldo-a'n a hattrick siamna remchang a hlah thung.

Ronaldo Ropuia
Kum 32-a upa Ronaldo a chuai tawh niin sawi a ni ṭhin a, mah se Portugal captain hian a 'season ṭhat loh kum' nia an sawiah meuh pawh record ropui a siam zel. Europe league sang pangaa goal khung hnem ber ni tur hian Manchester United tan match 196-ah goal 84 a khung a, Real tan match 264 khelin goal 284 a khung bawk - a ropui tih loh rual a ni lo.

Ronaldo ropuina em em chu a record a khum tak Jimmy Greaves khan league goal 366 khung turin Chelsea, Tottenham, AC Milan leh West Ham tan match 528 inlan a mamawh a, Ronaldo-a'n record khum tura a match mamawh zat erawh 460 niin Greaves aia a khelh tlemna chu match 68 a ni. Players la khel lai mek zingah Lionel Messi chu Ronaldo hnaih bertu a ni a, Argentine forward hian match 381-ah goal 347 a khung tawh.

Barca tan Malaga?
El Clasico-ah Barcelona-in La Liga beiseina thar neiin Real Madrid an hneh a, inkhelh zawha Zidane thusawi erawh, "Engkim hi kan kuta innghat a la ni," tih a ni - French manager sawi ang ngeiin a nauten an kuta awm nomawi thlauh an duh lo a, Barca an ngam loh hnuah league match ruk chhung chu a zawnin an chak ta.

Barcelona tan nomawi chawi tur chuan an match hnu­hnung bera Eibar hneha Malaga khelmuala Real an tlawm a ngai - Barca hian April 8 khan Malaga hi 2-0 in an lo ngam lo tawh a, Neymar hnawhchhuah a ni. Tunah chuan Luis Enrique-a nauten an champion kalkawng lo dal tawhtu Malaga hi hnathawh sak turin an beisei ang!

Zidane thukhawchang
Real Madrid manager Zine­dine Zidane chuan, "Match khat khelh tur kan la nei a, vawiin kan result kha a pawi­mawh takzet a ni. Kan tihtur kan hria a, vawiinah kan khelh chauh em avangin kan hmabak match-a ṭha taka khel turin kan inbuatsaih ang. First half-ah kan inhnehtawk viau a, khatianga khel tur kan ni lo. Mahse, chawlhlawk hman a nih hnuah ziaawm chhoin kan khel ṭha sawt viau a ni," tiin inkhel a thlir let.

Zidane chuan sawi chhun­zawmin, "Tunah hian champion kan la ni lo a, nomawi chawi turin point kan la mamawh. Kan mamawh nei tur hian kan hna ngai kan chhunzawm zel ang," tiin champion ngei a tum.