Coppa Italia champion Juventus
Juventus-in nomawi pakhat an chawi ta a, a dang pahnih an la beisei mek. Nilaini zan khan Juventus chuan Lazio 2-0 a hnehin Coppa Italia nomawi an chawi; Massimiliano Allegri naute hi a zawna he inelnaa vawi thum champion thei hmasa ber an ni.
Stadio Olimpico-a inkhelah Turin club tan hian Dani Alves (12') leh Leonardo Bonucci (24') ten goal an khung a, first half khelh zawh hmain champion tur a chiang der tawh. Juve hian goal dang kung belh lo mah se goal an venhim avangin a vawi 12 nana Coppa Italia champion ni turin goal hnih a tawk.
Napoli manager Simone Inzaghi-a'n final a ngaihpawimawh avangin kartawpa Fiorentina an hmachhawn ṭumin player ṭha tam zawk a chawlh hahdamtir, Juve lakah bul an ṭan ṭha zawk. Keita Balde Diao chuan goal ban a tih per nghal, a vannei tawk lo. Goal an phurh hnuah Felipe Anderson leh Ciro Immobile te goal khung tur chu Gianluigi Buffon-a'n a dan sak bawk.
Lazio hian tun hnai kum nga chhunga a vawi thum nan Coppa Italia final an khel a, kum 2015 final-a an ngam loh Juve bawk an ngam lo nawn leh. Kum 2013-a an ṭhenawm club AS Roma hneha an champion hnuah nomawi an la chawi leh lo a ni.
A dang pahnih
Italian manger Allgeri kaihhruaina hnuaiah Juventus hi Italy roreltu an ni mek a, tunah hian Serie A hmahruaitu niin point 85 an hmu tawh - pahnihna AS Roma aiin point liin an sang zawk, match hnih chiah khelh tur an nei tawh. Inrinni zan dar 6:30-ah Crotone an mikhual dawn a, point khat chauh pawh an hmuh belh a nih chuan a zawna a vawi ruk nan league title an la ang.
Treble champion ni turin Coppa Italia leh Serie A nomawi ringawt a tawk lo. Juve hian tun season-a lungthu kim tur chuan Champions League nomawi an mamawh. June 3 khian Cardiff-ah Real Madrid nen Europe-a club ṭha ber nih an inchuh dawn a ni.