Mourinho-a'n nomawi chiah a thlir

Manchester United manager Jose Mourinho-a'n Southampton hmachhawn turin a player neih ṭhat ber a luhtir lo a, Nilaini zana St Mary's Stadium-a inkhelah goal a lut lo.

Pathianni zan hian tun season Premier League match hnuhnung ber khelh a ni dawn a, Portuguese manager Mourinho chuan Crystal Palace an hmachhawn hunah Europa League final mila player a luhtir dawn avangin supporter-te chungah ngaihdam a dil lawk. United hi league-ah parukna an ni chiang tawh a, match hnuhnung ber result hian nghawng a nei lo.

Romero a hero

Minute ngana lekah hrem vanga Europa League final khel lo tur Eric Bailly handball vangin mualneitu Saints-in penalty an hmu a, Italian forward Manolo Gabbiadini penalty pet chu Europa League final-a United goalkeeper tur Sergio Romero-a'n a dan sak.

Argentine keeper Romero hian Saints goal khung tur vawi tam a dan sak a, United chance neih ṭhat ber chu minute 72-naah yard 25-na aṭangin Anthony Martial-a'n goal ban a pet per. Red Devils-in tun season-ah an khingpui vawi 15 ngawt an draw a, khingpuite draw tam ber an ni.

United hi Mourinho hnuaia an season hmasa berah vawi 17 chiah an chak a, Premier League-a Red Devils chak tlem ber ṭum a ni.

De Gea hmalam?

Manchester United keeper David de Gea chu season tharah Real Madrid-in an la dawn tih thawm a ring a, tun season-ah Spanish keeper hi a inlan a rinawm tawh loh.

Hemi chungchang zawhna chhangin Jose Mourinho chuan, "David hi season thar inpuahchahna atana kan match hmasa bera LA Galaxy kan hmachhawn hunah a khel ang. Palace nen chuan Joel Pereira luhtir ka duh a, Europa League final-ah Romero. Chutihrualin David hi khawvela keeper ṭha ber zinga mi a ni a, chelh ngei ka duh," tiin a sawi.

Fellaini a inhliam

Mourinho-a'n Europa League final-ah Marouane Fellaini chhawr ngei a duh a rinawm a, Belgian midfielder hi minute 75-naah inhliam vangin thlak a ni.

United boss chuan, "A malpui a hliam a, eng nge a dinhmun chiah hre lo mah ila ngaih ṭhat lohna tur a ni," tiin a sawi. Ajax an hmachhawn hunah English club hian Zlatan Ibrahimovic, Marcos Rojo, Luke Shaw leh Ashley Young te chu inhliam vangin an chhawr thei dawn lo.

Nomawi duh Mourinho

Portuguese manager Jose Mourinho-a'n Europa League champion a duh a, hemi neih theih nan chuan pawisak a nei lo ang. United boss chuan, "Khawvel hmun dang zawng chu ni se Pathiannia kan inkhel tur hi Inrinniah sawn a ni ang. Cyrstal Palace an him tawh a, keini parukna kan ni chiang tawh bawk nen result hian nghawng a nei lo," tiin final a ngaih pawimawh avangin league match sawn hma a duh.

Champion a duh vangin player ṭha a awltir dawn tih a zep lo. Mourinho chuan, "Pathiannia kan inkhelh hunah hian kan supporter-te hian min ṭan tho ka beisei a, kan khelh dan a fuh tawk lo a awm pawhin min hriatthiam a ṭul a, inrintawkna kan nei lo a nih pawhin min ngaihdam a ṭul a ni. Big Sam hian kan ṭhiat ṭhatna a lantir ka beisei a, Zaha pawh tlan muang turin a hrilh ka beisei a, Benteke pawh a hruai tel loh ka beisei a ni," tiin a ṭawngkamah a player luhtir dan tur a chiang hle.

Tun season-ah Manchester United hi Community Shield leh League Cup-ah an champion tawh a, amaherawhchu league-a parukna an nih avangin Europa League champion hi season thara Champions League khelh theih nan an mamawh a ni.