France champion Monaco

AS Monaco chu kum 17 hnua a vawi khat nan French Ligue 1 champion an ni leh ta. Leonardo Jardim-a naute hian Nilaini zan khan Saint-Etienne 2-0 in an hneh a, match khat khelh hmabak la nei mah se pahnihna Paris St-Germain tan umphak theih an ni tawh lo.

Stade Louis II-a inkhelah Kylian Mbappe chuan goal hmahruai a khung. Kum 18-a upa forward hian Radamel Falcao-a through ball dawngin Saint-Etienne tlarhnung a sut hawn hnuah keeper a bum zui leh, goal hmaah chi ai eih loin a khung.

Monaco tan champion ni turin point khat a tawk a, goal khung belh tawh lo pawh nise an mamawh tawk point an hmu dawn tih a chiang tawh; injury time-ah forward Valere Germain chuan an chak nemnghehna goal a khung leh a, inkhel a tawp zui - a vawi sarih nan Monaco chu league champion an ni.

Monaco hian tun hnai an league match hnuhnung 11-ah hnehna an chang vek a, point 92 hmuin an hnuai chiaha awm PSG hian point 86 an hmu thung. Nomawi an chhuhsak tak PSG ai hian an goal difference 19 in an ṭha zawk bawk.

Inkawp fuh

Monaco-in league nomawi an chawi hnuhnun ber chu 1999-2000 season kha a ni a, khatih laia an player langsar chu French trio - Fabien Barthez, David Trezeguet leh Willy Sagnol te an a ni, he mi hnuah hlawhtlinna an chang leh tawh lo.

French club hian kum 2014 khan Jardim an lalut. Portuguese coach hian a hun hmasa lamah PSG tluk lo mah se zawi zawiin hmalam a pan pui zel, season ṭan dawnin champion an tum ngam thu a sawi! A thu sawi hian mi awih a hlawh lem lo.

Kum 42-a upa Jardim hian striker tawnhriat ngah Falcao a ko kir. A kawppui turin rawlthar Mbappe a ring ngam bawk. Co­lombia international striker hian loan hmanga a khelhna Manchester United leh Chelsea tan match 36 a khelh aṭanga goal nga chiah a khung avangin coach thutlukna hi rin ngam a la har.

Amaherawhchu, Jardim hian Falcoa chungah rinna a nghat ngam. Porto striker hlui hian a pu rinna a thlawnin a liam tir lo. League-ah goal 24 a khung bakah assist vawi li a nei bawk - club top scorer a ni.

Season ṭan dawna mi beng­khawn loh Mbappe pawhin legaue goal 15 khungin young player of the year atan thlan a ni. Rawlthar duhawm hian Cham­pions League inelna lamah pawh hnuhma hraw tak hnutchhiah nghalin goal ruk a khung a, a club hi semifinal a thlenpui.

Siamtharna

Kum nga liam ta kha chuan Monaco hi French club te inelna sang berah an inlan phak lo, a sang ber dawt Ligue 2-ah an awm. Kum 2011-2012 season-ah phei chuan Ligue 2 aṭanga tla hniam leh thei dinhmunahte an ding hman hial.

A kum lehah chuan Monaco hian nasa taka hmasawnin Ligue 2 champion an ni a, inel­na sang ber Ligue 1 khel turin an tling. Ligue 1 an khelh leh aṭanga kum hnih hnu lekah chuan season khat chhungin goal 104 an khung a, an lamah goal 29 chauh lutin France rama team ṭha ber an ni ta.

Kuminah hian Ligue 2 champion an nih ṭuma player pali - goalkeeper Danijel Suba­sic, defender Andrea Raggi, winger Nabil Dirar leh forward Germain te chu player pawimawh an la ni reng.

Manager thukhawchang

Champion manager Jardim chuan, "Thawhhona ṭha tak nei chunga kan champion thei hi a lawmawm hle. Thla 11 chhung rim taka kan thawh rah kan seng a, coach ka nih china ka nomawi ngaihhlut ber kan hlawh chhuak ta a ni," tiin a sawi.

Jardim chuan sawi chhun­zawmin, "Kan tan chuan title hlu bik a ni a, kan hnathawh dan leh kalphung kan thlir chuan Paris-in kum li chhung an chawi tawh ai khan a hlu zawk," tiin Arab sum hmanga siam len PSG a kep tel zauh.

Monaco player ṭhenkhat hi European club lian dangte awh rawn an ni mek a, a bik takain Mbappe hming an lamri nasa tawh hle. Club vice president Vadim Vasilyev chuan an star player - Mbappe, Bernardo Silva leh Thomas Lemar te an chhuahtir dawn loh thu a sawi ve nghal zat bawk.