Rafael Nadal a vannei

Rafael Nadal-a'n Italian Open last 16 a lut. Nilaini zan second round inkhelah Nadal hian Nicolas Almagro a hmachhawn a, khup hlam vangin Almagro hian set khat pawh a khel tluan thei lo.

Rome-a inkhelah dar­kar chanve pawh an inkhelh hmangin Nadal hian 3-0 in hma a hruai hman, Almagro hian hliam vangin a khel zui thei lo - Nadal-a'n inkhel hah lutuk loin hnehna a chang.

Kumin Italian Open-ah Nadal hi seeded palina a ni a, Monte Carlo, Barcelona leh Madrid-ah te hlawhtlinna chang hlim a nih avangin Rome-ah pawh hian a vawi riat nan champion beiseina a nei sang hle.

Inkhel dangah Kei Nishikori chuan David Ferrer 7-5, 6-2 in a hneh ve bawk. Japan tlangval hian Kyle Edmund hnehtu Juan Martin del Potro a hmachhawn leh ang. Seeded pathumna Stan Wawrinka chuan Benoit Paire 6-3, 1-6, 6-3 in a hneh ve bawk.