AFC Cup Jeje-a hoin Bagan an chak

Mohun Bagan-in AFC Cup-ah beisei tur nei tawh lo mah se Jeje Lalpekhlua, Kean Lewis leh Bikramjit Singh te goal khat khung ṭheuh hmangin Bengaluru chu 3-1 in an hneh.

Bangalore club-in an mikhualna rama hnehna an chan zawh loh avangin last 16 lut tur chuan an match hnuhnung berah hmahruaitu Maziya S&C an hneh a ṭul tawh ang.

Inkhel Chu

Kolkata khawpuia in­khelah Bagan tan Jeje-a'n minute 9-na lekah goal hmahruai a khung a, Raynier Fernandes hnen aṭanga a ball hmuh ṭha tak chu um lutin Mizo keeper Lalthuammawia Ralte goal venah a khung - Asia rama club inelna sang ber dawttuah Mizo goal venah Mizo-in a khung.

Bengaluru-in minute 52-naah an si phurh an sut a, Daniel Lalhlimpuia ball siamsak chu Seminlen Doungel-a'n a khung. Sanjoy Sen-a naute tan Jeje-a'n a chance ṭha neih dang goal-ah chantir thei lo mah se minute 70 hnuah Kean Lewis leh Bikramjit Singh ten goal an khung avangin Bagan an chak chiang.

Jeje & record

Mizo tlangval Jeje-a'n tun season AFC Cup-ah goal nga a khung tawh a, season hmasa khan goal sarih khungin Indian player zinga Asia club inelnaa season khata goal khung hnem ber dinhmun a lo luah tawh - Asia-a Jeje goal khung zat hi goal 12 a ni tawh tihna a ni a, goal 11 khung tawhtu Sunil Chhetri a lehpel.

Indian player zingah Bhai­chung Bhutia chuan Asia huap club inelnaah goal khung hnem berin East Bengal, JCT leh Mohun Bagan tan goal 14 ngawt a khung a, pahnihna Mohun Bagan legend Sisir Ghosh chuan goal 13 a khung bawk - Jeje-a'n Indian player zinga Asia-a goal khung hnem ber record siam ngei a tum thu Vanglaini palai hnena a lo sawi tawh chu a hnaih zel.

Group E dinhmun
Team Pld W D L GF GA GD Pts
Maziya 5 4 0 1 10 3 7 12
Bengaluru 5 3 0 2 6 6 0 9
Mohun Bagan 5 2 0 3 9 10 -1 6
Abahani 5 1 0 4 3 9 -6 3