Dirk Kuyt a chawl ta

I club hmangaih tan hattrick siama league nomawi chawipui bawk tluka chawlh 'dan' duhthu­sam dang enge awm chuang ang? Chu 'duhthusam' ti hlawhtling tur chuan Feyenoord captain Dirk Kuyt chuan inkhelh a chawlhsan thu a puang ta.

Kum 36-a upa striker hian Pathianni zan khan Eredivisie (Dutch league) nomawi chawi tura chak ngei an mamawhna inkhelah hattrick a siam a, kum 19 hnua a vawi khat nan Feyenoord chu league nomawi a chawipui - an champion hlimthawm pawh a reh fel hmain Kuyt-a'n a chawlh thu a puang a, ropui takin footballer nun a mangṭha ta.

A hunah tak

Kum 19 chhung football khawvela a hun hmangtu Kuyt chuan, "Ka career-a thutlukna ka siam dawn apiangin ka thinlungin engtinnge min hrilh? tih hi ka ngaihtuah hmasa ber ṭhin a, tunah pawh hian ka thinlungin min hrilh ang thlapin thutlukna ka siam a ni," a ti.

Kuyt chuan sawi chhunzawm­in, "Kei chuan tun hi chawlh hun ṭha berah ka ngai a ni. Feyenoord-ah hun duhawm tak kum hnih chhung ka hmang a, kumina kan nomawi chawi hian a nawmna a belhchhah hle. Nomawi chawi a, Feyenoord champion pui hi ka duhthusam a ni ṭhin. Tunah chuan ka mang ram zawng zawng a thleng dik vek tawh a ni," tiin lungawi taka a chawlh thu a sawi.

Kan lawm e Dirk

Dutch club Utrecht-a a career bul ṭantu Dirk Kuyt-a'n hming a chherna tak chu Feyenoord a ni a, kum 2003 khan a zawm. Kum 2006-a Liverpool a zawm hmain Feyenoord tan season thum a khel hman a, match 122 a inlanah goal 83 a khung sak. Season kua a thang bo hnuah a hmangaih hmasa lamah hian a kir leh a, season hmasa khan match 38 khela goal 23 khungin Dutch Cup a chawipui a, tun season-ah match 38-ah vek goal 15 khungin league nomawi a chawipui ta thung.

Feyenoord technical director Martin Van Geel chuan, "Dirk-a'n kum hnih chhunga a hnathawh avanga kan lawmna hi sawifiah theih a ni lo. A rilru puthmang, a tuina leh puitlinna hmangin kan squad min ti chak a, dressing room, khelmual leh pawn lam thlengin kan chhawr a ni," a ti.

Liverpool 'hero'

Kuyt-a'n khawvel hmelhriat a hlawh ṭan tak takna chu Liver­pool a ni. Kum 2006 khan Kuyt hian pound maktaduai 10-in Reds a zawm a, a season hmasa berah Champions League final hruai thleng mah se kum ruk a cham chhungin League Cup chiah a chawi - Reds tan match 286 khelin goal 71 a khung sak.

Kuyt hian a goal khung theihna leh thiamna ai mah chuan khelmual chhunga player thawkrim a nihna a larpui hle a, defender aṭanga striker thlenga chhawr theih a nihna hi team tana a thawhhlawkna pakhat a ni bawk. Reds fan-ten Kuyt an hriatrengna erawh March 6-a Manchester United 3-1 a an hneh

ṭuma a hattrick kha a ni. Kum 2012 khan Reds hi chhuahsanin Fenerbahce a pan a, season thum chhungin Turkish Super Lig (1), Turkish Cup (1) leh Turkish Super Cup (1) te a chawi.

Dutch legend

Kum 36-a upa Kuyt hian Netherlands tan match 104 khelin goal 24 a khung a, 2014 World Cup-a pathumna an nih kha ram tana a inlan hnuhnung ber a ni. Ram tan hian World Cup 2006, 2010 leh 2014-ah te a inlan vek a, Euro 2008 leh 2012-ah Oranje (Netherlands sawina) tan a inlan bawk. World Cup 2010-a final an luh leh kum 2014-a pathumna an nih ṭum phei chuan player pawimawh a ni phak a ni.

Kum 2006 khan Dutch Footballer of the year leh Dutch Golden Shoe inzawm kumin he chawimawina hi a dawng a, kum 2003-a Utrecht tan a khelh laiin Dutch Golden Shoe a dawng bawk. 2004-05 season-ah khan Feyenoord tan goal 29 khungin Dutch league-ah top scorer dinhmun a lo luah tawh.