Celtics lakah James a hrang

Nimin zing NBA Eas­tern Conference Finals Game 1-ah Cleveland Cavaliers chuan Boston Cel­tics 117-104 in an hneh. Inrinni zing dar 6:00-ah Game 2 khelh leh a ni ang.

TD Garden-a inkhelah LeBron James chu Cavs chakna hnar a ni. James hian court chhungah minute 42 hun a hman chhungin points 38 a score bakah assist vawi riat a nei a, rebound ṭum kua a nei bawk.

Cavs tan hian James bakah Kevin Love chu player thawhhlawk niin point 32 a nei ve bawk a, NBA playoff a khelh tawh china match khata point a score hnem ber ṭum a ni.

Cavaliers hian tun season NBA playoff match kua an khelh tawh­ah hnehna an la chang vek. Nikum khan a zawna vawi 10 chakin NBA champion an ni zui, kuminah beisei an nei sang leh hle tawh.

James chuan, "Team kan ni a, mimal thawh­ṭhat vanga chak kan ni lo. Ka ṭhiante hian point ka score hnem theih nan min pui ṭha em em a, thawhhona ṭha nei lo ni ila hetiang zat hian kan chak thei lo ang," tiin a sawi.