KKR tan IPL final a hnai
Kolkata Knight Riders chuan IPL eliminator round-ah wicket sarihin Sunrisers Hyderabad an sawp a, zanin dar 8:00-ah Mumbai Indians nen qualifier 2 khelin final-a Rising Pune Supergiant hmachhawn tur an zawng ang.
Bengaluru khawpuia inkhel hi ruah surin vawi hnih lai a ti buai a, DL Method hial hman a ngaih phah - Sunrisers-in an khelh chhiat piahlamah ruahsur hi an tuarah a ngaih theih a, KKR tana captain Gautam Gambhir khelh dan erawh sawi nep theih a ni chuang lo.
SRH an chuai
Sunrisers Hyderabad an bat hmasa zawk a, captain David Warner chuan run 37 siamin inkhel bul pangngai takin a ṭan. Australian batsman a out hnuah erawh SRH player zingah run 30 vaw kai dang an awm tawh lo - over 20-ah run 128 chiah siamin wicket sarih an hloh a, target chhuanawm loh tak a ni.
Kolkata bowler Nathan Coulter-Nile chu SRH batting line-up tan hmelma a ni. Kum 29-a upa Australian bowler hian over li a vawmah run 20 chiah pein wicket thum a la a, wicket hnih latu Umesh Yadav chuan a thlawp ṭha viau bawk.
KKR vanneihna
Ruahsur vangin vawi hnih lai inkhel chawlh a ni a, zan dar 8:00-a inkhel kha zing lam dar 1:30 bawr velah an zo ve chauh! Ruahsur vangin DL method hman a ni a, KKR chu over ruka run 48 siam tura tuk sak an ni. Inkhel ṭan tir lamah Robin Uthappa (1), Chris Lynn (6) leh Yusuf Pathan (0) te an out nghal phuk phuk avangin KKR ṭantute rilru hahdam takin an awm thei lo.
Mahse, Kolkata club-in captain Gautam Gambhir an nei a, Indian batsman hian a naute tan entawn tur hnutchhiahin a team hnehna a chanpui - ball 19 lek a hmachhawnah run 32 a vaw chhuak a, over 5.2-ah run 48 siama wicket thum hlohin hnehna an chang ta a ni.
Captain Gambhir
Tun hnaia Champions Trophy khel tur India squad puang zingah Gambhir a tel lo a, mi tam tak mak tih a hlawh - kum 35-a upa batsman hian India team 'selector' ten dem an hlawh lehzualna turin a theihna a pholang leh ta a, hun harsa karah a team a chhanhim.
Gambhir-a'n khelmual chhung a luha KKR run siam zat chu run sarih chiah a ni a, over 1.1-ah wicket thum an hloh fel der tawh! Mahse, Gambhir-a'n a tawnhriat chhawr ṭangkaiin a chi ai duh loh a, run 32 vaw chhuakin a team tan chhandamna a thlen - zanin inkhelah pawh KKR tan innghahna a ni leh ang.