Watford manager Mazzarri a bang dawn
Premier League-ah inhamtanpui mah se Watford manager Walter Mazzarri chuan season tawpah English club hi a chhuahsan dawn a, May 21 zana Manchester City nena an inkhel tur chu Watford a enkawl hnuhnung ber tur a ni tawh ang.
Watford chairman Scott Duxbury chuan, "Mazzarri chu a hna hi bansan mai turin thutlukna kan siam a ni," tiin a sawi a, kum nga chhunga manager pariat an banna a ni dawn!
Inter Milan boss hlui Mazzarri hian May 2016 khan Hornets (Watford sawina) hi kum thum chhung enkawl turin a pan a, Quique Sanchez Flores a thlak. Watford a enkawl chhungin league match 37 an inlan tawhah vawi 11 hnehna chanpuiin 16-na an ni mek.
Mahse, 2012 Copa Italia-a Napoli champion puitu coach hi fan-te lakah a tla tlum lo nia sawi a ni a, an captain Troy Deeney bench-a a dah ṭhin avangin sawisel a tawk nasa hle bawk. Leicester manager hlui Claudio Ranieri leh Hull City boss Marco Silva-te chu Mazzarri hmun ruak luah tura sawi thawm a awm leh der tawh.