Champions League khel tur a chiang dawn ; Manchester City, Liverpool & Arsenal
Pathianni zan dar 7:30-a ni ang a, Premier League ngainatuten an nghahlelh inkhel hmuhnawm leh boruak sang an hmu dawn. Manchester City, Liverpool leh Arsenal ten Champions League khel turin hnehna chan an mamawh vek a, hmun ruak pahnih chiah a awm tawh avangin vanduai pakhat an awm dawn tih chu thil chiang sa a ni.
Pathumna City leh pangana Arsenal inthlauhna chu point thum chiah a ni a, tawlhthluk zeuha hming ṭhatna leh pound maktaduai 100 tel hu inchhuhsak theihna hun chu Pathianni zan a ni. City leh Liverpool tan Europe club ṭha zinga tel turin chak a tawk a, dinhmun chhe ber Arsenal tan hnehna chan ngei piah lamah an chunga club pahnih tawlhthluk chan tel a ngai thung.
100% leh Wenger
Arsenal-in Premier League club zinga tum châkawm lo pawl Everton an mikhual dawn a, hnehna chan a harsat dawn tehlul nen point thum hlawh chhuak pawh ni se an chung chiaha awm Liverpool-in hnehna an chang a nih chuan season tharah Champions League an khel chuang lo ang - a awlsam zawnga sawi chuan Gunners tan hnehna chan bakah Reds tawlhthluk chan tel a ngai a ni.
Liverpool boss Arsene Wenger chuan, "Champions League khelh chance kan neih dan lam ka ngaihtuah lo a, kan tana pawimawh ber chu hnehna chan a ni mai. England-a kan tih fo ṭhin angin ka player-te hian 100% pe se ka duh ber a ni," a ti a, pressure insiam a tum lo.
Wenger hma hun
Arsenal fans zingah Wenger duh lohna thu an tlangaupui nasa a, season tawp ruala a contract zo tawh tur manager hi contract thar ziak lo tura duhtu an tam hle. Nimin press conference-a a hmalam hun an zawhna hmasa Wenger-a chhanna chu, "Tun season chu Arsenal hi ka la enkawl ang," tih a ni!
Wenger hian a hmalam hun chungchang a sawi chhunzawm leh tho a, "Kan tana pawimawh ber chu hnehna chan a ni a, a hnu lama thil thleng chu kan ngaihtuah tur pawh a ni lo. FA Cup final kan khel phawt ang a, board-in ka hma hun chu an ngaihtuah ang," tiin a sawi.
Kan bei dawn - Klopp
Liverpool-in Middlesbrough an mikhual dawn a, hnehna an chan chuan season tharah Champions League an khel dawn tihna a ni. Reds boss Jurgen Klopp chuan, "Season duhawm tak kan hmang mek a, hlawhtling inti taka he season hi mangṭha kan duh a ni," tiin a sang pali zinga tel loh a duh lo.
Klopp chuan sawi chhunzawmin, "Ka duhthusamah tak chuan minute hnih a liam meuh chuan 4-0 in hma hruai tawh ila tih hi a ni a, mah se chu chu thil theih a ni si lo. Mahse, bul ṭan fuh lo pawh ni ila kan insiamṭha thuai ang a, theihtawp chhuahin kan bei ang. Champions League khel tura point hmuh ngai zat kan hmu thei lo a nih chuan Europe club ṭha zinga tel kan phu lo a ni mai," a ti.
Sum nei Reds
Jurgen Klopp chuan, "Champions League hi inelna ropui tak a ni a, a sum ken tel pawh a tam em em. He inelna hi kan inpetkai thei a nih chuan sum kan neih belh dawn tihna a ni a, chu ringawt pawh chu a ṭha em em a ni," tiin a sawi.
German manager Klopp chuan sum an neih thu sawi nghalin, "Sum lama buaina nei lo club kan ni a, players ṭha lakluhna tur sum chu kan nei," a ti a, transfer bazar lam a hawi leh der tawh! Klopp thusawi aṭanga thlir chuan tun hnaiah Reds-in Monaco rawlthar duhawm Kylian Mbappe lakluh nan pound maktaduai 64 an theh chhuak nia sawi thuthang a awihawm sawt hle.
Pathumna City?
Manchester City-in zanin dar 7:30-ah Watford an lenchilh dawn a, Pep Guardiola leh a naute tan pathumna dinhmun sawh nghet turin hnehna chan a ngai. City-in Pep Guardiola an lakluh tirh kha chuan tun dinhmun hi an ngaihtuah kherin a rinawm loh a, nomawi chawi duh club an ni.
Spanish manager Pep pawhin a dinhmun a hrechiang a, "Tun dinhmun angah hi chuan Barcelona leh Bayern Munich coach ni ila ban ka ni tawh ang. Mahse, hetah chuan chance pek ka ni a, season tharah hei aia ṭhaa tih ka tum ang," a ti a, pathumna aia hniama season khar a tum lo.
May 21, Pathianni
Arsenal 7:30 PM Everton
Burnley 7:30 PM West Ham
Chelsea 7:30 PM Sunderland
Hull City 7:30 PM Tottenham
Leicester City 7:30 PM Bournemouth
Liverpool 7:30 PM Middlesbrough
Man United 7:30 PM Crystal Palace
Southampton 7:30 PM Stoke City
Swansea City 7:30 PM West Brom
Watford 7:30 PM Man City