Chelsea kutah nomawi hlan dawn

Pathianni zan dar 7:30-ah Premier League champion thar Chelsea-in Stamford Bridge-ah Sunderland an mikhual ang a, inkhelh banah lawmman semna hun hman a ni ang.

Mittui nen Terry

Chelsea captain John Terry-a'n an match hnuhnung bera Watford nena an inkhelh ṭumin goal a khung a, English defender rorum tak hian club badge dawm chungin a goal khung a lawm.

Blues ṭantu bakah English football tuipui tan chuan Pathianni zan hi hun bik a ni a, Antonio Conte hote nomawi chawi hun a ni satliah lo - Terry thlahna hun a ni.

Kum 36-a upa Terry hi Black Cats an hmachhawn hunah khelhna hmun a chang lo a nih pawhin captain-in nomawi an chawi ṭhin avangin lawmman sem hunah chuan Chelsea kawr nen a rawn lang dawn. London club-in tun dinhmun a thlen theih nana a theihna zawng zawng hlantu Terry hi Pathianni zanah Blues ṭantuten a hnahthawh an hriatpui tih an lantir let ve ang.

Medal dawng tur

Premier League-in dan a nei a, champion team zinga match nga khel tling hnenah medal hi pek tur a ni. Brazilian midfielder Oscar leh Serbian defender Branislav Ivanovic ten Chelsea tan match nga an khelh hman avangin medal an dawng dawn.

Hetihlai hian match hnih lek inlan Asmir Begovic chuan medal a dawng dawn a, kum 29 mi hi first choice goalkeeper Thibaut Courtois thachhang dawltu a nih avangin hriatthiam a ni.

Bosnia-Herzegovina inter­national keeper Begovic chuan, "Ka ngaihdan chuan dan hi thlak a ngai a ni. Medal dawng tura match nga khelh a ngai tih ang hi ka hriatthiam dan zawng a ni lo. Kum tluanin team ṭhatna turin theihtawp kan chhuah a, football khelh chhunga hetiang chawimawina dawn hi a hlu a ni," tiin dan ennawn ṭul a tih thu a sawi.

Chelsea player zinga match nga khel tling lo langsar zual chu Nathan Ake, Kenedy leh Ola Aina te an ni. Amaherawhchu champion team hian medal 40 an dawng dawn hrim hrim a, player dawng pha chinin an dawn hnuah Chelsea hian medal bang chu player, coaching staff leh official zinga phu an tih hnenah an pe leh ang.