Lahm leh Alonso tan match hnuhnung
Zanin dar 7:00-ah Bayern Munich chuan league match khel turin SC Freiburg an mikhual dawn a, German club legend Philipp Lahm leh Spanish legend Xabi Alonso-te tan football khawvela an match hnuhnung ber tur a ni tawh ang.
Kum 33 leka upa nichunga football mangṭha tur Lahm hian Bayern-ah kum 15 hun a hman chhungin Bundesliga (8), German Cup (6), Champions League (1) leh FIFA Club World Cup (1) nomawi a chawi hman a, a thutlukna sut turin Bayern boss Carlo Ancelotti-a'n a nawr nasa hle.
Mahse, Germany tan pawha World Cup nomawi lo chawi tawh defender chuan, "Carlo hian ka chawlh lohna turin a remhriat dan hrang hrangin hma a la a ni ber a, nitin deuhthaw hian min thlem ṭhin a ni. Mahse, ka match hnuhnung ber ka khelh hun tur hi phur takin ka thlir a, ka tan chuan ni hlimawm tak a ni ang," a ti.
Lahm chuan sawi chhunzawmin, "Hriatreng tlak sulhnu tam tak ka nei a, chung zinga pakhat erawh ka match hmasa bera Lens kan hmachhawn ṭum kha a ni - minute thum lai ka khel ve! Fan-te hian footballer ṭha tak angin min hre reng se ka duh ber mai," a ti a, season tharah Franck Ribery chuan an inkhel enna tur season ticket a duh chuan a lei sak tur thu a sawi lang nghal!
Germany captain hlui chawlh ruala chawl ve tur a awm a, Xabi Alonso a ni. Kum 35-a upa midfielder pawh hian zaninah Bayern tana a match hnuhnung ber a khel dawn a, coaching lama sawmtu a nei der tawh - Pep Guardiola ngat!
Bayern-a Alonso hruai luttu, tuna Manchester City boss ni mek Pep chuan, "Xabi, i chawlh aṭanga thla ruk hnuah chuan coaching lama luh châknain i khat dawn tih ka hre reng a, ka lo nghak reng dawn che a ni," tiin Liverpool player hlui hi City coaching staff zinga tel turin a duh.
Liverpool, Real Madrid, Bayern Munich - a kalna apianga fan-te lawm hlawh ber pawl ni thei Alonso chuan, "Real Sociedad-ah khan La Liga nomawi chawi turin match khat chiah kan mamawh a, mah se kan puitlin lo. Liverpool-ah Premier League ka hnaih hman em em a, Bayern tan Champions League nomawi ka chawi lo bawk. He thil pathum hi football-a ka inchhirna awmchhun a ni a, duham mah mah pawh minti mai thei. Ka footballer zinkawngah hian a lawm erawh ka lawm tawk viau e," tiin a sawi ve bawk.