5-2 a chak, Mizoram lawm lo

22nd Senior Women's National Championship-ah Mizoramin nimin khan Uttarakhand 5-2 a sawpin point hlawh chhuak mah se Lalsangzuala Hmar hote an lawm lo.

Phagwara, Pun-jab-a inkhelah hian Mizoramin goal hnih an phur hmasa a, second half-ah goal ngain an chhang let. Mizoram tan hian Grace Lalrampari'n hattrick a siam bakah Lalruatsangi leh Lalbiakdiki ten goal khat ve ve an khung.

Mizoram coach Sanga chuan, "Ṭan aṭanga minute 10 chhung lekin penalty vawi hnih dik lo taka pek an ni. Hei chauh hi a ni lo, dar 4:30-a inkhel tur kan nih avangin dar 3:00-a thlen kan duh. Amaherawhchu bus chuanna kal tlai vangin dar 4:00-ah kan thleng chauh a, player checking an neih bawk avangin warm up-na hun ṭha kan nei lo," tiin a lungawi loh thu Vanglaini a hrilh.

Mizoram hi Group D-ah Pondicherry, West Bengal leh Uttarkhand nen an awm ho a, team pakhat chauhin quarterfinal an lut dawn. Mizoramin Uttarkhand an hneh hma hian West Bengal an draw tawh a, Group D inkhel dangah Pondicherry-in Uttarakand 15-0 in sawp tawh bawk. Pathianni khian Pondicherry leh West Bengal te an inkhel ang a, Mizoramin May 23 khian group match hnuhnung berah Pondicherry hi an hmachhawn dawn a ni.