Pathianni zanah Fed Cup final
Federation Cup 2017 final chu Pathianni zan hian Barabati Stadium, Cuttack-ah champion lai Mohun Bagan leh Bengaluru FC ten an khel dawn a, Ten 2-ah a en theih ang.
Bengaluru FC hian semifinal-ah I League champion Aizawl FC an hneh a, Mohun Bagan-in nomawi humhim turin an hmelma East Bengal hnehin final an lut ve bawk.
Intluk tawk
Bengaluru FC hi kum 2013-ah din a ni a, I League an khelh hmasak berah kum 2014 khan an champion nghal. Blues hian I League nomawi an humhim thei lo a, an mual Sree Kanteerava Stadium-a Mariners an hneh loh avangin a vawi khat nan Kolkata club an champion.
Bagan-in I League an champion
ṭum hian Federation Cup-ah a vawi khat nan Bengaluru FC-in nomawi an chawi thung. Season liam ta khan Bengaluru FC-in a vawi hnih nan I League nomawi an chawi leh a, Fed Cup-ah Mohun Bagan an champion ve bawk. India ram football hi Mariners leh Blues inelna ang hiala ngaih theih a ni.
Tun season-ah erawh Mizo club Aizawl FC rawn langin Bagan leh Bengaluru FC ban phak lohin I League-ah an champion a, Fed Cup-ah erawh Mariners leh Blues thoin nomawi an inchuh ang.
Intum ngun
Tun ṭum hi Bengaluru leh Mohun Bagan te tun season-a vawi ruk an inkhelhna tur chiah a ni. I League-ah Blues-in an mualah goal awm loin draw mah se Bagan-in an mualah 3-0 in an hneh thung.
AFC Cup-ah Bengaluru FC-in an mualah 2-1 in an hneh a, Nilai zana an intawn hnuhnung zawkah erawh Bagan hi an mualah 3-1 in an chak a, Kolkata club tana goal hmahruai khungtu chu Jeje Lalpekhlua a ni.
Fed Cup-ah hian group stage-ah club pahnih hi awm dunin 1-1 in an inhnehtawk. Tun season-a an inkhelh tawhna match nga thlir letin Mariners an chungnung hret a, champion tura rinkai zawk pawh an ni. Amaherawhchu Bengaluru FC hi an chak a nih pawhin 'upset' a ni chuang lo ang.
Final-ah chuan
Bengaluru FC-in an midfielder pawimawh Eugeneson Lyngdoh hrem vangin an chhawr thei dawn lo a, amaherawhchu inhliam vanga Aizawl FC hmachhawn thei lo Sunil Chhetri a awm tawh dawn a, Mizo tlangval Daniel Lalhlimpuia chu inkhel bul ṭantura ngaih a ni bawk.
Mizo tlangval Jeje-a'n AFC Cup-ah goal khung mah se Mohun Bagan boss Sanjoy Sen-a'n Balwant Singh-a chungah rinna a nghah a rinawm a, amaherawhchu goal an mamawh a nih chuan Hnahthial tlangval Jeje hi a theihna a san em avangin bench-ah a hun pum a hmang lo ang.
Final Kalkawng
BENGALURU FC
Group Stage
Bengaluru FC 3 - 2 Shillong Lajong
BFC : Udanta Singh 35'; Eugeneson Lyngdoh 46'; Aiborlang Khongjee 74' (OG)
SLFC : Yuta Kinowaki 72'; Samuel Lalmuanpuia 85' (P)
DSK Shivajians 2 - 0 Bengaluru FC
DSK : Juan Quero 71' (P), 76'
Mohun Bagan 1 - 1 Bengaluru FC
MB : Sony Norde 50'
BFC : Alwyn George 11'
Semifinal
Aizawl FC 0 - 1 Bengaluru FC
BFC : Cameron Watson 8' (P)
MOHUN BAGAN
Group Stage
Mohun Bagan 4 - 0 DSK Shivajians
MB : Balwant Singh 24', 71'; Darryl Duffy 65'; Jeje Lalpekhlua 90+2'
Shillong Lajong 2 - 3 Mohun Bagan
SLFC : Pritam Kotal 3' (OG); Yuta Kinowaki 80'
MB : Darryl Duffy 5'; Sony Norde 27'; Katsumi Yusa 43'
Mohun Bagan 1 - 1 Bengaluru FC
MB : Sony Norde 50'
BFC : Alwyn George 11'
Semifinal
Mohun Bagan 2 - 0 East Bengal
MB : Darryl Duffy 35'; Balwant Singh 84'