Real Madrid champion zan?
Spanish La Liga champion ni turin Real Madrid-in match khat hmabak an la neihah point khat chiah an mamawh tawh - manager Zinedine Zidane chuan, “Kan tana hna hautak ber chu kan hmaah a inchhawp mek a, nitinin kan tum ram kan hnaih zel tih erawh hmuh hmaih theih a ni lo,” a ti a, Pathianni zan dar 11:30-a Malaga an lenchilh hunah boruak a sang dawn tih hai rual a ni lo.
Barcelona tan nomawi beiseina a la bo bik lo. Pathianni zan dar 11:30 veka Eibar hmachhawn tur Luis Enrique chuan, “Midang kan ngaihtuah dawn lo. Kan match la neih chhuna chak ka duh a, champion tur chuan chu chu kan tih a ngai a ni,” a ti - Malaga hmaa Real an tlawm a, Barca-in hnehna an chan chuan Catalan club hian champion nomawi an chawi ang.
Kum nga lai a liam ta
Real Madrid ropui zia sawi fo ni ṭhin mah se tun hnai La Liga-ah kher erawh an ropui tawk lo. Barcelona hliahkhuhna hnuaiah season an mangṭha fo a, league nomawi an chawi hnuhnun ber chu 2011-12 kha niin Jose Mourinho enkawlna hnuaiah point 100 nen nomawi an chawi.
Player hlawh tam leh langsar rual zingah Toni Kroos, Dani Carvajal, Isco, Marco Asensio, Luka Modric, Gareth Bale, Keylor Navas, Nacho, James Rodriguez, Casemiro, Mateo Kovacic, Lucas Vazquez leh Danilo ten La Liga nomawi an la chawi ngai lo a, chenna ngai loh rama cheng tura an mamawh zat point khat hlawh turin an theihna zawng zawng an pe ang.
Zidane = record?
Player a nih laia Zinedine Zidane ropui zia hrilh nawn kan ngai lo. Coaching khawvel a luhchilh hnuah pawh French manager hian ‘mi bik’ a nihzia a pholang chhunzawm zel. Real a enkawl hmasak ber season hmasaah Champions League nomawi a chawi a, tun season-ah manager ‘naran’ tana tih theih loh ti thei dinhmunah a ding leh mek.
Kum 44-a upa manager hian Champions League final-ah a naute a hruai thleng tawh bawk a, La Liga champion ni tura a point mamawh zat lah point khat a ni - Zidane hian Europe a club inelna sang berah nomawi a chawi thei a nih chuan Champions League nomawi humhim thei hmasa ber an ni dawn a, La Liga a champion tel bawk chuan kum 1958 hnua Real-in nomawi pahnih an chawi kawp leh hmasa ber a ni bawk ang.
Barca tan Malaga
Malaga-in Barcelona chhul chhuak striker Sandro Ramirez an kawl a, kum 21-a upa striker hian a hmangaih hmasa Barca-in nomawi an chawi theih ngei nan theihtawp a chhuah tur thu a sawi. Nipui transfer-a Malaga pantu striker chuan, “Barcelona hi La Liga nomawi ka pek theih ngei ka beisei a, ka mang ram hlawhtlintir ka duh a ni,” a ti.
Barca senior team-a hlankai a nih hnua season hnih leka La Liga (2) Copa del Rey (2) leh Champions League (1) nomawi chawitu striker chuan, “Barcelona lakah hian bat tam tak ka nei a, an tan tih let sak neih ve ka duh a ni,” a ti a, Real tan hna a awlsam dawn lo - Spain tana age level hrang hranga inlan tawh striker hian tun season-ah match 30 khelin goal 16 a khung tawh tlat!
Pep iangin Enrique?
Season tawp rualin Luis Enrique-a’n Barcelona a chhuahsan dawn a, tun dinhmun en chuan nomawi pakhat nen chiaha Barcelona a mangṭhana chance a sang hle. Catalan club player hlui hian Barca a enkawl hmasak ber season-ah treble champion a nihpui a, amah ang thoa Barca player hlui Pep-a’n Catalan club a enkawl hmasak bera a zinkawngah kawng a rawn zawh ve nghal.
Tun dinhmuna Enrique dinna erawh a duhawm ta lo hle - Pep khan Barca-ah a hming chher viau mah se a season hnuhnung berah Spanish Cup nomawi chiah chawiin Catalan club a mangṭha a, Copa del Rey final khelh tur la nei Enrique hi Guardiola ang maia Barca mangṭha thei dinhmunah a ding mek - Pathianni zanah engkim a chiang dawn e.
Zanin Inkhel Tur
Sporting Gijón 8:30 PM Real Betis
Leganés 10:30 PM Deportivo Alavés
Deportivo 10:30 PM Las Palmas
Sevilla 12:30 AM Osasuna
May 21, Pathianni
Atlético Madrid 8:15 PM Athletic Club
Valencia 8:15 PM Villarreal
Celta de Vigo 8:15 PM Real Sociedad
Barcelona 11:30 PM Eibar
Málaga 11:30 PM Real Madrid