Spurs-in champion lai an sawp Goal khung thei Kane

Tottenham Hotspur-in Premier League nomawi beisei tawh lo mah se champion lai Leicester City khelmual King Power Stadium luhchhuahin goal ruk an khung. Spurs hmatawnga hriam ber Harry Kane-a'n goal li khungin English striker hian league match khat khelh tur la awmah goal 26 khungin top scorer a ni.

6-2

Ningani zan inkhelah Kane-a'n minute 26-naah Spurs goal hmahruai khungin Son Heung min-a'n minute 36-naah goal hnihna a khung leh a, halftime-ah 2-0 chauh a la ni.

Second half minute 59-naa Hugo Lloris tihsual vangin Ben Chilwell-a'n goal khungin Leicester City-in beiseina thar an insiam a, amaherawhchu Foxes goal hi Mauricio Pochettino hote chhaih kawlhna chauh a ni.

English striker Kane-a'n goal thum (63', 88', 90+2') dang khungin Son-a'n goal khat dang a khung belh a, hun tawpa Spurs chakna zat chu 6-2 a ni.

Spurs an ṭha

Tottenham-in tun season-ah goal 79 an khung a, 1984-85 season hnua goal 75 aia tam an khung lehna hmasa ber a ni.

Harry Kane-a'n season hnih chhung goal 25 chuang a khung thei a, hetiang dinhmuna ding thei chu Robbie Fowler, Thierry Henry, Alan Shearer leh Robin van Persie te chauh an la awm.

October 2011-a Manchester City-in champion lai Manchester United 6-1 a an hneh ṭum nen khan tun ṭum hi champion lai chak loh chian ber ṭum a ni. Spurs manager Pochettino-a'n London club-ah rinawm zel a tum a, an player ṭha an chelh thei bawk chuan season tharah pawh champion rinkai zinga mi an ni ang.