Nadal leh Djokovic chak nuamsa

Rafael Nadal-a’n clay court season a hman ṭhat a chhunzawm zel, Ningani zan khan Novak Djokovic pawhin harsatna nei loin Italian Open quarterfinal a in vaw kai ve bawk.

Rome-a inkhelah Nadal hian seeded 13-na Jack Sock chu 6-3, 6-4 in a hneh. Spain tlangval hian tun season clay court bikah match 17 a khelh tawhah hnehna a la chang vek a, set 32 la tawhin set hnih bak a la hloh lo.

Italian Open vawi sarih champion tawh Nadal chuan, “Hmasawnna tur ka la nei reng, tuktin hian engtianga ṭhain nge ka khelh theih ang tih hmuchhuak turin training ka nei ziah. Tunah chuan ka forehand hmanga winners tam zawk vaw chhuak tura inzir ka duh,” tiin a sawi.

Nadal hian quarterfinal-ah Dominic Thiem a hmachhawn leh ang. Thiem hian Sam Querrey lakah hnehna chang turin vanneihna a mamawh. Querrey-a’n match point vawi thum a hmuh tawh chu pawtthla lehin 3-6, 6-3, 7-6(7) in hnehna a chang let ta zawk a ni.

Inkhel dangah world number 2 Djokovic chuan Roberto Bautista Agut chu 6-4, 6-4 in a hneh ve bawk. Nikum khan Serbian tlangval hian final-ah Andy Murray a hneh lo, kuminah erawh world number 1 hi a match hmasa berah a chak lo nghal.

Grand Slam vawi 12 champion tawh Djokovic tan Rome Open hi French Open atana inbuatsaihna hnuhnung a ni dawn a, champion a tum ruh ang - quarterfinal-ah Kei Nishikori hnehtu Juan Martin del Potro a hmachhawn leh ang.