Swansea-in Terry dawr tum

Premier League club Swansea City manager Paul Clement chuan season tawpa Chelsea chhuahsan tur John Terry chu inbiakna neihpui a tum thu a sawi. Kum 36-a upa Terry hian Stamford Bridge a chhuahsan tur thu a tichiang tawh a, tun hnaiah sawmtu a neih dan a zira inkhelh a chawlhsan hial zawk mai theih thu a sawi a ni.

Clement hi Terry nen an inhre ṭha hle. Carlo Ancelotti-a’n Chelsea a enkawl season hnih chhungin assistant manager dinhmun a luah a, an season hmasa ber 2008-09 ah Premier League leh FA Cup nomawi an chawi. Kum 45-a upa manager chuan, “Terry hian football khelh chhunzawm zel a tum leh tum loh ka hre lo a, mah se titipui ngei erawh ka tum. Hun rei tak chhung chu kan lo inhre tawh a ni,” a ti a, English defender hi Bournemouth pawhin an duh nia sawi a ni bawk.

Hetihlai hian Swansea boss chuan a coaching staff zinga mi, season tawp thleng an hnena cham tura an lakluh Chelsea midfielder hlui Claude Makelele chu contract thar an zawrh tur thu a sawi.