Chhun dar 12:30-ah Sialhawk Vs Ramhlun North
Sialhawk lamah chuan 'titi' dang a leng tawh lo, hawina lam apiangah football chu an chaw tui ber a ni. Ramhlun North lamah pawh chuti tho - All Mizoram Inter Village Football Tournament-ah semifinal an lut a, football chanchin an sawi bang thei lo.
Vawiin chhun dar 12:30 hian Lammualah 'fan favourite' Sialhawk leh Ramhlun North te an inkhel dawn a, football game mawi lam a pawimawh tawh lo - chak a pawimawh ber dawn.
Sialhawk leh Ramhlun North-te hian game mawi danglam lantir lo mah se chak an thiam tih an lantir ve ve tawh a, vawiinah erawh a vanduai zawk pakhat an awm ang.
Sialhawk tan Unji Lasi
Sialhawk hi kum 2011 chhiarpuia a lan dan chuan chhungkua 430 vel awmna chauh a ni a, mipui pawh 2,279 chauh an awm. Aizawlah awm ta se, veng lian zingah an tel pha lo.
Mahse, tun ṭum inelnaah hian khelmual chhung leh pawnah thawm an nei ṭha a, an pualin an khaw mil hla ṭha tak an nei tawh.
An hla thunawnah chuan, "Unji Unji, Sialhawk tan aw! Kan theihtawp chhuah zel ang suihlung rualin. Lasi Lasi, kan duai nem le! Sialkhawpui kan thanlai a sang zel e," tiin a inziak - Lammualah an zaipui nasa tawh hle.
Thu hian awmzia a nei a, Sialhawk mipui an phur a, an khuaah pawh 'big screen' in inkhel an thlir a, an khaw tlangvalten theihtawp an chhuah avangin eng team pawh hneh thei an ni.
Sialhawk chu
Sialhawk hian MPL hmasa ber best player R. Laldanmawia an kawl a, Crespo Vanlalhriatpuia an kawl bawk. Player langsar dang nei lo mah se an fitness a ṭha a, an fixtures a fuh tel bawk nen tun hun hi an thleng
Sialhawk hian semifinal thleng tur hian goal 34 an khung a, goal thum chiah an chhuah. Goal 34 hi player 10 khung a ni a, kil tinah goal khung thei an kawl.
Sialhawk hi an khaw mipui bakah an khaw chhuakten an ṭawiawm ṭha a, an thlenna Bethlehem hi MPL club nei khawpa football tui an ni. An ṭawiawm ṭha bawk ang.
Ramhlun North hi
Ramhlun North hi first round-ah an bye a, Ramhlun Derby-ah Ramhlun Venglai 4-1 a an hneh hnu pawhin rin an la hlawh lo.
Hemi hnu hian Falkawn 4-2 in an hneh a, team ṭha Bawngkawn 1-0 a an hneh hnuah erawh an thlir dan a danglam ṭan.
Round of 16-ah Ramhlun North-in giant killer Thenzawl West 3-1 in an hneh a, quarterfinal-ah Armed Veng South 2-1 in an barakhaih zui. Tunah chuan Ramhlun North hi team ṭha an ni tih an pawm tlang tawh a, Sialhawk lakah pawh team ṭha zawka ngaih an ni mai thei?
Ramhlun North hian hmun pawimawhah player ṭha an kawl. Goalkeeper-ah tawnhriat nei Lalṭanpuia an nei a, tlarhnungah defender lian leh chak ṭha Benjamanin J. Lalrinliana'n a ho. Midfield-ah Lalpekhlua Jongte leh captain V. Lalchhuanawma te an awm a, goal khung turin K. Lalrosanga leh PC Lalhruaisanga te an awm bawk.
Coach Jonathan C. Lalrin-tluanga chuan, "Kan khelhpuite a zirin kan insiamrem ṭhin. Tun hi game thlak danglam chiam hun a ni tawh lo. Nuam ti takin Sialhawk lakah khelh kan tum a, Ramhlun North mipui puihna nen chak ngei pawh kan inbeisei a ni," tiin Vanglaini a hrilh.
Ramhlun North forward PC Lalhruaisanga leh K. Lalrosanga ten goal nga ve ve an khung tawh a, Sialhawk tlarhnung tan buaina tham an tling ang.