Juve hnungah Lazio an kal zel

Serie A nomawi inchuh boruak sang a la zo lo, champion lai Juventus leh anmahni umtu Lazio ten an khingpui an hneh ve ve a; team lian pahnih daidangtu chu point li chauh a ni.

Zirtawpni zan khan Old Lady chuan an mikhual Lecce lakah zahngaihna lantir loin 4-0 in an sawp a, point sarihin an kal fal hman. Inrinni zanah Lazio inlan zui ve lehin goal an phurh hmasak hnuah Fiorentina 2-1 in an hneh a, an inkar an sawr zim leh a ni.

Nomawi inchuh pahnih hian hahchawlhna hun an nei mang lo. Thawhlehni zan hian Genoa khelmualah Juventus an lenglut zui dawn a, anmahni umtu Lazio pawh Torino tlawh turin an zin chhuak ve bawk ang.

Allianz Stadium-a inkhelah Lecce defender Fabio Lucioni chu minute 31-naah hnawhchhuah a ni a, team nem leh player nei chhe zawk tan chak beiseina a thamral zui nghala ngaih a ni - player kim loa an khelh hnuah hian goal li an chhuah.

Paulo Dybala-a'n goal hmahruai a khung hnuah Cristiano Ronaldo chuan season kal laia a goal 23-na chu penalty aṭangin a chhuih lut a, hun tawp dawn lamah substitute Gonzalo Higuain leh defender Matthijs de Ligt te chuan an khung belh bawk.

Portuguese forward Ronaldo hi kum 35 mi ni tawh mah se player vantlang chunglam a la ni reng. Penalty a khung bakah hian an goal hmasa ber Dybala khung chu a siamsak a ni a, league match 24 a khelh aṭanga goal 23 khung hi a nep lo hle.

Juventus manager Maurizio Sarri chuan, "Ni thum dana match neih zel chu a hautak ngei mai, player an chauin an tha a za nep bawk. Lecce lakah pawh a tir lam minute 30 chhung kha chu kan khel ṭha tawk lo hle, a hnu lamah erawh vanneih thlak takin kan hna ṭha takin kan hlen.

"Player kan mamawh hnem a, defender De Ligt bakah Covid-19 kai player an dam kim tawh. Douglas Costa pawh mamawh huna chhawr theih turin a inpeih tawh bawk, striker Higuain pawhin a hna pangngai a thawk leh ta," tiin player fit neih hnem a pawimawh thu a sawi.

Turin club hian a zawna a vawi kua nan Serie A nomawi chawi an tum a, a zawna league champion rei record an siam hi ti ropui zual turin an kutah engkim a innghat. Khelh hmabak match 10 an la neih avang erawh chuan inthlahdah a thiang lo.

Coronavirs len hnua an match hmasa berah Lazio an tlawm a, nomawi a hla sawt. Simone Inzaghi naute hi Fiorentina lakah erawh an chesual nawn lo; veteran Franck Ribery-a goal hmangin hnufual mah se Ciro Immobile leh Luis Alberto te hmanga chhang letin point thum an hlawh chhuak.

Hun tawp dawnah boruak a sosang, Fiorentina striker Dusan Vlahovic chuan Patric a nghawk lui tih VAR hmangin an hmu a, hnawhchhuah a ni. Lazio manager Simone Inzaghi pawh a inbeng dai thei lo, khelmual sira a nungchang mawi lo vangin red card an pe ve bawk a ni.

Italian manager Inzaghi chuan, "Atalanta kan hneh lo kha a na in pawi kan ti takzet a, kan chak lohna khan point thum hmuh chaka tuihalna min pe. Player zawng zawng an theihna sang berin an khel, khatiang inkhel hmuh kha chuan lung hi a awi ṭhin," a ti.