Khatla TBL 1 - 1 Zarkawt BCA Zaninah MSL champion a hriat dawn

Mizoram Super League season 7 chu zaninah a hmawr bawk a ni dawn. Team ṭha pahnih Zarkawt BCA leh Khatla TBL ten nomawi chawi tur zawk an chingfel dawn, dar 8:30-ah inkhel ṭan a ni dawn, ṭhutna ṭha chang duh tan kal hma a fuh ang.

Ningani zan khan finals game 2 khelh niin BCA chu 78-65 in an chak, best of three series-ah 1-1 a ni ta chiah. Tun ṭuma chak zawk hian nomawi an chawi dawn; R. Dengṭhuama Indoor Stadium, Mualpuiah fans nei ṭha zawk nih a pawimawh dawn.

Khatla TBL hi MSL hmasa pahniha champion an ni a, a hnu lamah an la champion leh thei rih lo. Zarkawt BCA hi tun hnaiah a zawna vawi thum champion thei an ni thung - TBL tan BCA record nih rual turin chak ngei ngei a ngai.

Champion tum BCA
Zarkawt BCA hian league round an thunun theih avangin champion tura rinkai an ni. Mahse, an tum leh rin ang ngawt a ni bik lo. Finals game 1-ah Khatla TBL lakah an mualpho a, point neih an harsat bakah an basket an venghim ṭha lo.

Game 2-ah erawh ropui takin an tho chhuak. Joseph Allen an chhawr thiam a, tualchhung player ṭha Lalrina Remthei-in hla tak aṭanga a ball pek American player-in a 'Dunk' pawp laite chuan thawm a ṭha rem rem hle, zaninah tih nawn an tum ang.

BCA coach Lalruatfela (Afela) chuan, "Game 2-ah kan chak lo a nih chuan a pawi thui thei tih ka hria, chuvangin ruahmanna pawh kan siam uluk. Mizo player dan kan tum a, kan thil tum a hlawhtlin bakah a bul kan ṭan fuh em avangin a vannei zawkah kan ṭang hram.

"A hmunah min ṭantu tam tak an awm, anni kha kan chakna hnar an ni. Game 3-ah pawh min ṭawimawm leh turin ka sawm," tiin Vanglaini a hrilh a, tualchhung basketball inelna sang berah a zawna a vawi li nan champion an tum thu a sawi bawk.

Lalrina bakah Matthew Remtluanga Sailo chuan point 10 a nei tling bawk, foreigner chauh ni loa tualchhung player ṭha an nei hi an chakna hnar a ni ṭhin. Zonunsanga chu TBL tana venngun ngai bik zinga mi a ni leh bawk ang.

TBL an zam lo
Game 1 an lak theih avangin TBL hian BCA hneh turin theihna an nei tih a chiang, league round-ah khan vawi khat chu an lo hneh tawh bawk. Zaninah pawh vawi hnih champion tawh team hian chak tumin an inlan dawn tih coach Vanlalnunsanga (Lana) chuan a sawi.

TBL coach Lana chuan, "Kan player an chau, chutih rualin chhuanlam atan hman chi chu a ni lo. BCA khelh ṭhat zan kan tawng a, keini lam khelh chhiat nen a inrual a, kan tuar ta a ni. Game 3-ah chuan boruak a danglam kan beisei," tiin Vanglaini a hrilh.

Point 38 neitu Levi Bradley Jr. langsar viau mah se thlawptu a nei ṭha lo. Khatla TBL tan tualchhung player zingah point 10 nei tling an awm lo, quarter thumna bikah phei chuan an team pum hian point sarih chiah an nei, quarter khata point an neih tlem ber ṭum an tawng hial.

Player a nih laia TBL champion pui tawh Lana chuan, "State pawn player chauh hi innghahna chi a ni lo tih a takin kan hmu, hnehna chang tur chuan tualchhung player an chetṭhat a pawimawh ṭhin," tiin a sawi a, game 2 khelh zawh taka an tihsualte siamṭhat ngei an tum.

TBL hian theihna an nei, an theihna sang tak ti lang chhuak tur erawh chuan thawhhona ṭha an mamawh. Holam taka tihsual neih a pawizia an hrechiang tawh a, zaninah chuan a tir aṭangin an khingpui hi kalfal tir an tum lo ang, kal sang fal zawk nih an tum ang.