I Day Football leh MPL a hnai; Player ṭha an inchuh nasa

Mizoram Football Association-in season thar atana inbuatsaihna ni pah fawmin LBS Suzuki All Mizoram Inter Village Football Tournament 2022 a buatsaih a, tualchhung football a nun phah hle.

Transfer Window
Football season inṭan dawn a, pawimawh ber chu 'transfer window' a ni a, hei hi player inziahluh hun a ni.

MFA chuan player transfer leh inziah luh hun a siam chu District FA ṭhenkhatte harsatna tawh thlir chung leh, Centralised Registration System (CRS) kalpui ṭan kum a nih bawk avangin August 31, 2022 thleng transfer leh registration tih hun a pawt sei. He mi chhung hian state chhung leh inter state transfer zawng zawng tihfel vek tur a ni.

MPL club-ten hun ṭha bawhpelh an tum lo a, player ṭha an inchuh nasa. Inter Village-a player langsar-ten club an nei fur tawh a, chutihrualin phai club beisei an awm avangin contract la sign lo player an awm thung.

A tawi zawngin MPL club pariatten an mamawh tawk player an nei deuh vek tawh a, chutihrualin squad tih chakna tur player 2-3 chu an lak belh hlawm ang.

MPL chu
Season hnih zet hripui leng avanga MPL kalpui theih a nih tawh loh hnuah tun season-ah MPL kalpui ṭan leh turin MFA leh Zonet TV chuan ruahmanna a siam.

MFA chuan MPL kal zel dan tur zir chiangtu study group dinin an rawtna thlente chu a pawm a, season tharah MPL khelh danah kalphung thar ṭhenkhat a awm ang.

MPL Board din a ni a, MPL kalpui dan tur kimchang hi anni kutah hian a awm dâwn a, ruahman lawk ang chuan August thlà tawp lamah emaw, September thlà tir lamah emaw MPL khelh ṭan a ni ang.

I Day Football
I Day Football Tournament hi mipa, hmeichhia leh veteran tán khelh tura ruahman a ni.

Mipa inelnaah hian Mizoram Premier League club pariat - Aizawl FC, Chanmari FC, Chawnpui FC, Chhinga Veng FC, Electric Veng FC, FC Bethlehem, FC Venghnuai leh Mizoram Police FC te an inel ang.

Mipa inelna hi August 1 aṭanga khelh ṭan tura ruahman a ni a, August 15-ah final khelh a ni ang.

Women's I Day Football
Hmeichhe inelna hi invitation tournament-a kalpui tur a ni a, MFA Women's Committee lamin an buaipui ang. MFA Women's Committee chuan 'talent search' remchang atan hman nghal an tum a, Higher Secondary School ṭhenkhat sawmin he inelna hk kalpui tum a ni.

Hre chiang duh tan Secretary, MFA Women's Committee R. Lalramzauva (9436156858) zawh fiah theih a ni.

Veteran I Day Football
Veteran hi kum 40 chung lam inelna tur a ni a, a duh apiang tán tel theih a ni a; July 23, 2022 hmain MFA Office-ah entry fee Rs 1,000 pek tur a ni. 1982-a piang chin an khel thei ang a, inkhelh dan kalphungah playing 11-ah 40+ (1982) mi panga, 45+ (1977) - mi pali leh 50+ (1972) mi pahnih an awm reng tur a ni ang.

Hre chiang duh tan Secretary, MFA Veteran Committee Hmingthansanga (9436146386) zawh theih a ni ang.