Thomas Tuchel-a'n Ronaldo lam a hawi lo
Cristiano Ronaldo hma hun a chiang thei rih lo. A agent Jorge Mendes-a'n Chelsea neitu Todd Boehly a dawr a, American sumdawng hausa hian thutlukna chu Thomas Tuchel-a siam tur a nih thu a sawi.
Blues manager Tuchel chuan, "Tunah chuan tlarhnung lam thuam chakna tur kan ngaihtuah," a ti. Ronaldo an lak loh tur thu sawi lang lo mah se, an club chuan defender an zawn avangin Ronaldo lam an hawi rih lo tihna a ni ang.
London club hian Manchester City aṭangin Raheem Sterling an la fel tawh, tlarhma lam aiin a hnung lam thawm phui tumin hma an la mek. Napoli defender Kalidou Koulibaly chu season li chhung atan an lalut dawn.
Ronaldo dinhmun
Real Madrid leh Juventus tana a khelh hnuah Ronaldo hi Old Trafford-ah a kir. Man United tan season hmasa khan player ṭangkai a la ni, mahse a club hi Champions League khel turin a tlinpui zo lo a, nipui bazar lai hian chhuah a duh thu a sawi zui.
Man United manager thar Erik ten Hag-a'n Ronaldo hi a ruahmannaah a tel thu a sawi, mahse Asia leh Australia rama season thar inbuatsaihna an neihah Ronaldo hi a tel lo, hei hi mimal thil vang a nih thu a sawi bawk.
Thuthang a tam a, amah berin chhuah a duh miau avangin Ronaldo hi club hrang hrang nen sawizawm a ni. A dik ber erawh hriatthiam a harsa, chiang taka lang thei erawh Champions League khelh phakna hmuna awm a duh tih a hriat theih.
PSG hming a ri
Football fans tam tak inhnialna chu Lionel Messi nge Ronaldo ṭha zawk tih a ni a, inhnialna tawp thei lo tur a ni. Fans tam tak chuan anni pahnih hi club pakhat tan khel dun se, tiin duhthu an sam thin - chumi tihlawhtling thei tur chu Paris Saint-Germain an ni.
PSG hian Ronaldo lalut turin hun remchang an nei a nih hmel, mahse kar khata £500,000 hlawhtu Ronaldo lakluh leh ngawt hi thil awlsam a ni lo. Club neitu lamin duh pawh ni se, financial fair play dan an zawm a ngaih avangin squad tih danglam vak a ngai dawn.
Hlawh hnem Messi, Neymar leh Kylian Mbappe te an nei sa a, chuvangin French champion hian an squad tihdanglam chiam ai chuan Ronaldo hi lakluh rih lo mai an duh niin khawthlang media-te chuan an tarlang.
Khawiah nge?
Champions League khel tur club a zawm duh a, UCL khel satliah ni loin team ṭha zinga tel chu a duhthusam a ni bawk ang. Tuna a zawm theih beiseiawm chu Bayern Munich an ni, anni hian Ronaldo hi an duh ang em, sawi theih erawh a ni lo.
Bavarians striker ṭha Robert Lewandowski-a'n chhuah a duh, mahse club lamin chelh an duh thung. Lewy hi a chhuak a nih chuan Bayern tan Ronaldo hi lak theih a ni ang, a chhuak lo a nih erawh chuan Portuguese forward hi an lak a rinawm loh thung.
Ronaldo hian sum ringawt ngaihtuah ni se chuan hlawh hnemna tur a hmu. Saudi Arabian club pakhat chuan season hnih chhungin, euro maktaduai 275 zet hlawh turin an sawm tih thawm a awm, hei erawh UCL khelh aiin a thlang lo thung a ni.