Dembele tan kum hnih daih contract

Barcelona chuan France forward Ousmane Dembele chu season hnih daih contract an ziahpui. Xavi Hernandez-a'n a player duhzawng a ni a, thla hmasa khan a contarct hmang zo mah se inremna an siampui leh ta a ni.

Kum 25 mi Dembele hian 2017 khan Borussia Dortmund aṭangin Barcelona hi a pan, a tirah pound makatduai 96.8 man zet niin £135.5m thlenga pung chho thei a ni, a hunlai chuan khawvel player man tam berte zinga mi a ni phak.

Theihna nei sang mah se hliamin a tibuai ve fo, Catalan club tan hian inelna hrang hrangah match 150 chauh a la khel. Goal 32 khungin a ṭhiante khung tur vawi 34 a siamsak thung, khelmualah hun a hman tam loh avangin sulhnu a nei tam tawk lo.

Xavi rawn lan hnuah beiseina thar a nei a, season hmasa bik khan match 32 khelin assist vawi 13 a nei, goal hnih a khung bawk. A theihna sanzia hrechiangtu Xavi-a'n chelh a duh, season tharah a theihna tak pholan a tum ang.

Barcelona hian squad thuamchak an la tum zek. Tun nipui bazar chhungin Franck Kessie leh Andreas Christensen te an la fel tawh, forward Dembele an chelh bakah Raphinha chu Leeds United aṭangin an la bawk.