Thiem-a'n hnehna a chang ve leh ta

Hun rei tak hliam avangin a chawl a, thla 14 hnua a lo kir leh hnuah pawh a che fuh thei lo - a match hmasa 10 tehmeuhah a chak lo vek. Tunah chuan Dominic Thiem tan kawl a êng ve leh ṭan ta niin a lang.

Swedish Open-ah Thiem hi a inlan a, a match hmasa zawkah Emil Ruusuvuori a hneh hnuin, tunah chuan seeded palina Roberto Bautista Agut a hneh leh ta. Thiem hian Agut hi 7-6 (5), 3-6, 6-4 in a hneh.

Kum 28 mi Thiem chuan, "Emil-a ka hneh khan inrintawkna min siamsak a, player ṭha dangte hmachhawn turin ka inpeih a ni tih ka hre nawn. Tunah Roberto kan hneh ve leh ta, ani hi tlawm duh ngai lo mi a nih avangin hmachhawn a harsa thei hle.

"A zawnin player ṭha pahnih ka hneh a, anni ka hneh thei a nih chuan tun hma lama ka khelh dan angah khan ka lo kir ve leh ta niah ka ngai," tiin a sawi, nizan khan Sebastian Baez nen inhmachhawn zui lehin an result kan hre hman lo.

Austrian tlangval Thiem hian 2020 khan US Open nomawi a lo chawi tawh. Clay court inelna lian French Open-ah pawh ṭum hnih chu final a lut tawh bawk. Hard court inelna lian US Open hi September thlaah khelh a ni dawn. New York-ah player hmuhnawm a ni leh hman ang.

A inkhelh loh rei avangin a ranking pawh a tlahniam nasa hle, tun dinhmunah world number 339 a ni a, inelna lian hmachhawn tur chuan qualifier a khelh a ngai ang. Amaherawhchu, wildcard an pe a nih erawh chuan main draw aṭangin a khel ṭan nghal thei dawn.