De Jong manah United leh Barca an inrem; buaina a la awm!
Manchester United chuan Barcelona aṭanga midfielder Frenkie de Jong lalut turin Catalan club chu inremna an neihpui a, Netherlands international mamah hian pound maktaduai 63.5 an theh chhuak dawn - mahse, an lalut thei rih chuang lo!
De Jong hian Barcelona chhuahsan a duh lo a, mahse, Catalan club thuneitute chuan an sum dinhmun avangin chhuah a ngaih thu an hrilh - a chhuak dawn a nih chuan Dutch midfielder hian Barca-in a hlawh an batte pek tlak a ngiat thung.
Barca hian kum 2019 khan Ajax aṭangin De Jong hi £86mtd-in an lalut a, mahse, an sum hman thiam loh vanga buaina leh Covid-19 vanga buaina a innang a, an player tam tak chu an hlawh an pe tla nghal lo.
De Jong pawh hi Barca-a a hun hmasa lamah hian a hlawh tihhniam a ni a, Barca hian euro maktaduai 17 an la batsak - hei chauh hi buaina a ni lo. Club leh player inrem dan chuan, De Jong hi July 1 aṭanga chhiar ṭan khan Barca-ah kum li dang a cham ang, tih a tel a, hemi contract-ah hian a hlawh an batsakte an pekna tur hi a tel.
Dutch midfielder hian a hlawh a hmuh theih nan Barca-a cham a mamawh tihna a ni a, Catalan club hian €17mtd hi pe nghal se chuan De Jong pawh hian amah duh lotu club tana khelh reng ai chuan United pan mai hi a thlang ngeiin a rinawm - a hlawh hi hmuh ngei a duh.
United chief executive officer Richard Arnold leh football director John Murtough te chu kartir khan Barcelona-ah hian an zin a, season dang ang chu ni se pre-season tour-ah a tu emaw zawk zawk chu zin ve tur an ni.
Mahse, coach thar Erik ten Hag-a'n United a pan ruala lakluh a duh hmasak ber De Jong hi Old Trafford-a seng luh ngei an duh a, club thuneitu sang pahnihin pre-season tour ṭhulh meuhin an zin chilh.
United hian £63.5mtd pek an inhuam bakah, a khelh ṭhat dan a zirin £8.5mtd pek belh an inhuam - Barca hian heti zata De Jong an hralh theih chuan hralh vat an duh nia sawi a ni a, Catalan club hian Dutch midfielder hi a career atan a chhuah a ṭhat zawk thu thlengin an hrilh a, a ṭhat loh vang ni loa an sum dinhmun avanga chhuahtir tum an nih thu thlengin an hrilh niin an sawi.
Barcelona hian vawiinah pre-season tour nei turin USA an pan dawn a, he thu buatsaih a nih lai hian De Jong an hruai tel dawn leh dawn loh a la sawi theih loh.
Catalan club hian Inter Miami (July 20), Real Madrid (July 24), Juventus (July 27), New York Red Bulls (July 31) te chu US-ah hian an inkhelhpui ang a, Spain-ah kir lehin, Mexican club Pumas UNAM (August 7) leh Manchester City (August 24) te an hmachhawn ang a, August 28 zanah Real Valladolid nen season thara an league match hmasa ber an khel ang.
Red Devils lam hian De Jong an lalut thei lo a nih chuan midang dawr tur pawh an hual sa nia sawi a ni a, mahse, Dutch midfielder hi lakluh ngei an duh avangin nghah rih an hreh lo.
De Jong hian Barca tan inelna hrang hrangah match 140 khelin goal 13 a khungsak a, assist vawi 17 a nei a, 2020-21 season-ah Copa del Rey nomawi a chawipui tih loh chu champion nomawi chawi a la nei lo thung.
Hetihlai hian United hian pre-season training tura Cristiano Ronaldo rawn kir dawn leh dawn loh an la sawi thei lo a, Potuguese forward hian Champions League khelh duhin chhuah dil mah se mumal taka dawrtu an la awm rih lo niin a lang.