Toronto-ah Serena inlan dawn

Serena Williams chuan US Open khelh ngei a tum, inbuatsaih nan Toronto, Canada-ah Nationa Bank Open a khel dawn, hard court inelna a hmachhawn tur thu hi Serena chuan a ti chiang tawh.

Grand Slam vawi 23 champion tawh Serena hi hliam vangin kum khat chhung a chawl, tun hnai khan Wimbledon a rawn khel ve leh chiah. All England Club-ah hian beissei ang tak chuan a hlawhtling lem lo.

Kum 40 mi a ni tawh a, atan tournament zawng zawng khelh a remchang tawh lo. Mahse, New York khawpuiah ṭha taka inelna hmachhawn tur chuan inbuatsaihna ṭha erawh a ngai thung si a ni.

American player Serena chuan, "Ka hma hun atan hian a nihna takah chuan ruahmanna fel tak ka nei rih lo, tennis chawlhsan tumna ka la nei rih lo tih chu ka chiang. A pawimawh ber erawh taksa leh rilru a inpeih a ngai," tiin a sawi.

Grand Slam title lak hnem lamah Serena hian tluk loh pakhat a nei. Vawi 24 champion tawh Margaret Court hnungah a awm mek, Australian legend tluk turin hun ṭha a nei fo a, mahse tun thlengin a la hlawhtling thei rih lo.