Moshiri-a'n Everton a zuar lo

Everton neitu Farhad Moshiri chuan tun hnaiah club hralh tur anga thuthang awm mah se Merseyside club hi hralh a tum loh thu a sawi a, British sumdawng Peter Kenyon leh a thawhpuite nen tun hnaiah indawrna nei mah se Moshiri hian an inbiakna chu a lo titawp tawh a ni.

Moshiri chuan, "Kan football club-a investment chungchang leh, lei chhawn thlengin tun hnaiah sawi rik a awm a, ka sawi duh erawh Everton hralh tumna hi tun hnaiah a awm rih lo," a ti.

British-Iranian sumdawng hausa hian February 27 khan 49.9% share chu Everton-ah hian a lei a, January 2022 khan share hi lei belhin 94% ngawt share a nei tawh.

Arsenal-a share nei ṭhin Moshiri hian Everton hi Champions League khel phak club-a siam a châk viau a, Merseyside club tan hian pound maktaduai 600 chuang zet a seng tawh bawk.

Mahse, tun hnai season thumah Everton hian £372mtd an hloh a, season hman zawh takah khan Premier League aṭangin an relegate teuh viau bawk - season tawp lamah an him hram.

Moshiri chuan, "Club-a investment awm thei thlithlai hi a ṭha reng a, chutihrual chuan Everton Football Club hi ka zuar lo tih erawh ka hrilh duh che u a ni," a ti.

Everton hian 2024-25 season aṭanga luah ṭan turin Bramley-Moore Dock-ah stadium thar an sa mek a, mi 53,000 lenna tur stadium sak nan hian pound maktaduai 500 vel sen a ngai dawn.

Dollar tluklehdingawn 2.9 hausakna nei nia sawi Moshiri hian stadium sak meka sum senso a tam avangin stadium tan hian investment a zawng a, a dawr zinga mi, Manchester United leh Chelsea chief executive hlui Kenyon leh a thawhpuite chuan club-a share neih tel an duh - mahse, Moshiri-a'n club hralh tumna erawh a nei lo.

Everton hian nipui transfer-ah free transfer-in Burnley centre back James Tarkowski an lalut tawh a, player dang lakluh erawh an la nei lo - hetihlai hian an 'star' player Richarlison erawh Tottenham Hotspur lamah pound maktaduai 60-in an hralh tawh thung.

Moshiri chuan Everton fan-te chu nipui transfer tawp hunah chauh anmahni teh turin a ngen a, kum 67 mi sumdawng hausa chuan, "Frank Lampard squad tichhah turin theihtawp kan chhuah reng a ni," tiin a sawi.