Brentford-in keeper thar an nei

Premier League club Brentford chuan Albania goalkeeper Thomas Strakosha chu free transfer-in an lalut a, kum 27 mi keeper hian season li chhung khel turin contract a ziak.

Albania tana vawi 19 inlan tawh Strakosha hi Lazio academy aṭanga inzir chhuak a ni a, Serie B club Salernitana-ah season khat loan-in a chhuak tih loh chu club dang tan a la khel ngai lo.

Lazio tan match 208 a khel hman a, Coppa Italia leh Supercoppa Italiana-ah vawi hnih ve ve champion nomawi a chawipui - season hman zawh takah khan inelna hrang hrangah match 31 a la khel.

Mahse, season tawp rualin a contract a hmang zo a, English football lamah chona thar hmachhawn turin Serie A lam a pemsan ve ta.

Brentford manager Thomas Frank chuan, "Top goalkeeper kan lalut thei hi ka lawm takzet a ni. Lazio-ah hun rei tak chhung number 1 a ni thei a, chu ringawt pawh chu a ropui êm êm a ni.

"Serie A leh European football-a inelna lo hmachhawn tawh a ni a, a tawnhriat ringawt pawh hi kan tan chuan a ṭangkai dawn a ni," a ti.

Strakosha hian international thilah paltlang ngai a la nei a, engkim a fel hunah Germany-a pre-season training nei lai Brentford squad a zawm ang.

Brentford goalkeeper coach Manu Sotelo chuan, "Kan goalkeeper duh ang chi tak a ni a, kan buaina tam tak a chingfel thei ang. Shot-stopper ṭha tak, a dinna tur hmun hre tak a ni," a ti.

Bees (Brentford sawina) hian kum 18 mi midfielder Yehor Yarmoliuk an lalut bawk a, Ukrainian Premier League club Dnipro-1 aṭanga an lakluh player hi kum thum chhung atan contract an ziahpui.

Ukraine tana Under-16, 19 leh 21-ah te inlan tawh Yarmoliuk hian Dnipro-1 tan season thum chhungin inelna hrang hrangah match 21 khelin goal khat a khung a, a kum zat ngaihtuaha tawnhriat a neih ṭhat avangin Bees hian an la tifuh viau thei.