Toulouse leh Amiens te an tla chiang

French Ligue 1 aṭangin Toulouse leh Amiens te chu an tla chiang tih nemngheh a ni. France rama football inelna sang berah hian season tharah pawh team 20 bawk kan hmu chhunzawm dawn tihna a ni.

Coronavirus vangin Ligue 1 hi April thla khan tihtawp a ni a, table hnuai lama awm pahnih Toulouse leh Amiens te hi Ligue 2 lamah an tla. Tlahniam pahnih hi French Court-ah zualkoin Ligue 1 khelh leh an beisei.

Toulouse leh Amiens ten an beisei dan chuan kuminah tla bik awm lo a, season tharah Ligue 1 chu team 22 in khel se, tih a ni. Season thar an hman zawh leh hunah team pali tlahniam mai se tih chu an duh leh rawt dan a ni bawk.

Mahse, Ligue 1 club tam zawkin tlahniam awm an duh a, French Football Federation chuan an kalphung pangngaia an kal theih tur thu hi Zirtawpni khan an tichiang zui nghal a ni.

French Cup final chu July 24-a khelh turin an ti chiang. Paris St Germain leh St Etienne ten nomawi an inchuh ang, French Cup final khelh zawh aṭanga kar khat hnuah PSG hian Lyon chu League Cup final an khelhpui zui 

bawk ang.