England-in tlawm an tum bik lo

ODI series match khatnaa an mualpho hnuin England an insiamṭha lehnghal a, match hnihnaah India chu run 100-in an hneh ve leh ta - series-ah 1-1 in an inhnehtawk mek a, match khat khelh tur la awma chak zawkin series an la ang.

England leh India hian July 17, Pathianni tlai dar 3:30-ah series match thumna an khel leh dawn a, 'final' a ni tawh - he inkhela chak zawk zawk hian 2-1 in ODI series an la dawn a ni.

Ningani zana match hnihnaah England tan Reece Topley a vul a, kum 28 mi fast bowler hian run 24 chiah pe chungin wicket ruk a la a, England chakpuitu a ni. Lord's Cricket Ground, London-a inkhelah England an bat hmasa zawk a, over 49-ah run 246 siamin an out vek a, Men in Blue tan target harsa lutuk niin a lang lo.

Mahse, mikhual India-in match hmasa an phak lo a, over 38.5-ah an out vek a, run 146 an tlin hram - Hardik Pandya leh Ravindra Jadeja te chu India tana run siam hnem ber an ni a, run 29 ve ve chiah an tlin!

Inkhel chu
Ṭhumvawrah India an vannei zawk a, vawm hmasak an thlang - England-in over 49-ah batsman an hloh vek a, run 246 an tlin hram. Batsman zingah run 50 vaw tling pawh an awm lo.

England batter zinga run siam hnem ber Moeen Ali (47) leh David Willey (41) te an ziaawm viau a, mahse, England tana ding chhuak dang zingah run 40 vaw tling thei dang an awm lo a, inchhuan a har.

Indian bowler zingah Yuzvendra Chahal chu player che ṭha ber a ni a, over 10 a vawmah run 47 chiah pein wicket li a la a, a vawm out zingah run siam hnem ber Moeen Ali a tel.

Team pahnih intawn hmasaka wicket ruk latu Jasprit Bumrah chuan over 10-ah wicket hnih chiah a la a, Mohammed Shami pawhin wicket khat bak a la lo.

A hming Topley
Match hmasa zawka awlsam taka chak tawh India tan run 246 um phak chu thil harsa lo niin lang mah se India an che sual nghal - batsman chhuanvawr leh captain Rohit Sharma chuan ball 10-a hmachhawnah run siam nei miah loin a out.

Shikhar Dhawan (9 runs) pawhin a ṭhianpa mualphona a khuh zo lo a, Virat Kohli (16 runs) lahin ngai a awh hleithei lo - Kohli hma hian Rishabh Pant chu run siam miah loin a thi bawk.

India hian over 20.2 lekah run 73 siamin wicket nga an hloh der tawh a, chak tur a chiang hman. Suryakumar Yadav (27) chuan Men in Blue tan beiseina siam ve hman mah se Topley kutah bawk a out a, English bowler 'puja' a fuh laklawh.

Kum 28 mi fast bowler hian Rohit, Dhawan leh Yadav bakah beiseina siamtu Shami (23), Yuzvendra Chahal (3) leh Prasidh Krishna (0) pawh a vawm out a, India lakah England chu chiang takin hnehna a chanpui.